INKANTOLO eNkulu yaseThekwini igwebe owesilisa odilikajele abathathu neminyaka engu-85 ngoxhaxha lwamacala okukhona kuwo nawokubulala eMlaza.
UBongumusa Sphesihle Radebe (25), wasesigcemeni kwa-B eMlaza, ugwetshwe ngoLwesithathu emini.
Uwaphike kwaze kwaba sekugcineni amacala nokuthe uma esemgojele wacela uxolo emindenini yabagilwa.
Ugixabezwe udilikajele icala ngalinye lokubulala uLoyiso Shabalala, Sthembiso Njapha noMthobisi Shibase.
Abafi babulawa ngokudutshulwa ngoDisemba 2020, Meyi 2021 nangoJuni 2023.
Ijaji liphinde lagweba uRadebe iminyaka engu-15 icala ngalinye kwamathathu okuzama ukubulala, neminye engu-15 icala ngalinye kwamabili okuphanga kuhlonyiwe.
Inkantolo igwebe uRadebe iminyaka engu-10 ngokutholakala nesibhamu nezinhlamvu okungekho emthethweni nezinyanga ezingu-12 ngokutholakala nemoto okwakukholakala ukuthi uyebile.
Enkantolo kuvele ukuthi lokhu kubulala kwakuthinta amaqembu amabili ezigelekeqe ayeqembukelene eselwa futhi kunombango ofaka phakathi izidakamizwa.