Nkosikhona Cele
BELISEQHULWINI udaba lwabafelokazi abasembonini yamatekisi abehlulekayo ukuqhuba umsebenzi wamatekisi uma sekudlule emhlabeni abayeni babo engqungqutheleni yokukhethwa kobuholi obusha bohlaka lomama be-Santaco KwaZulu-Natal.
Kule ngqungquthela ebiseMgungundlovu, bekuhloswe ukukhetha ubuholi obusha njengoba kuhlalukile ukuthi bukhethwa njalo ngemuva kweminyaka emine. Loyo okhethwe kwesikaSihlalo walolu hlaka, uNksz Mhle Mjoli, uchaze lolu hlaka njengolumqoka kakhulu ebantwini besifazane abasembonini yamatekisi.
Uthe lukhathula indima enkulu ekucathuliseni labo besifazane okusuke sekusemahlombe abo ukuqhubeka nomsebenzi wabayeni babo uma sebedlulile emhlabeni. Leli yiphuzu athe limqoka kakhulu nathe akumele ukuba lishalazelwe embonini.
Uthe kumqoka kakhulu ukuba balekelelwe omama okusuke kulukhuni satshe kubona ukuqhuba umsebenzi wabayeni babo uma sebebashiyile.
''Kuningi okwenziwa yilolu hlaka lwabantu besifazane embonini yamatekisi. Okunye kwakho ukubamba ngengalo lucathulise labo besifazane okusuke sekumele baqhubeke nomsebenzi wemboni yamtekisi uma sekudlule emhlabeni abayeni babo,'' usho kanjena.
Ugcizelele ukuthi lolu hlaka kumele lukwazi ukuvala leyo ntuba, luhlinzeke ngosizo kuloyo wesifazane ngoba usuke eludinga ngokushesha. Ukhulume nangokuthi ziningi izinselelo abesifazane abasembonini yamatekisi abaye bezithole bebhekene nazo wathi uhlaka kungumsebenzi walo ukubhekana nazo ngqo maqede zinqotshwe.
Nalu uhlu oluphelele lwabesifazane abayishumi abakhethwe ukuba babe yingxenye yohlaka. KwesikaSihlalo kube nguNksz Mhle Mjoli, iPhini uNksz Jabulisile Khumalo, Nobhala nguNksz Sihle Nkosi, iPhini likaNobhala nguNksz Gloria Mngadi, uMgcinimafa nguNksz Nokuthula Kheswa, uMxhumanisi uNksz Zibuyile Ngcobo, Obhekelele uqeqesho nguNksz Thandeka Luthuli, kwesikaChamplain kwaqokwa uNksz Cawekazi Mshengu, kwase kuba namalungu amabili angeziwe okunguNksz Phumzile Madide noNksz Sizakele Mdluli.
Lolu hlaka kuhlalukile ukuthi lubunjwe ngabesifazane abavela kuzona zonke izifunda ezahlukene ezibumba i-Santaco KwaZulu-Natal.
Okhulumela le nhlangano, uMnuz Sfiso Shangase, uchaze uhlaka njengolukhathula indima enkulu ezintweni ezehlukene. Uthe yilona olwenza umsebenzi omkhulu ekucathulisweni kwabafelokazi embonini uma abayeni babo sebedlulile emhlabeni.
Naye uligcizelelile elithi akumele isinkwa sasekhaya siwe phansi ngoba nakhu ubaba wekhaya eselele kobandayo.