KUKHALWE ngezitshudeni ezingaphezu kuka-350 000 ezilinde umnyama ongenafu njengoba zingakazitholi izimpendulo zoxhaso esikhwameni esixhasa ngezimali zokufunda ezikhungweni zemfundo ephakeme, iNational Students’ Financial Aid Scheme (NSFAS).
Lezi zitshudeni kuthiwa azikwazi ukubhalisa ezikhungweni zemfundo ephakeme ngoba alukho olubambekayo oluvela kulesi sikhwama, siqinisekisa ukuthi zingaqhubeka nokufunda ngoba uxhaso ziyaluthola.
Umbiko othulwe yisikhulu esiphezulu seNSFAS, uMnuz Masile Ramorwesi, ekomitini lezeMfundo ePhakeme ePhalamende izolo, uveze ukuthi zingu-369 320 izitshudeni ezisalinde izimpendulo zoxhaso esikhwameni.
Uveze ukuthi bathole izicelo zoxhaso kulo nyaka ezingu-1.9 million, okwamanje sekuxhaswe izitshudeni ezingu-989 998.
Ubalule nokuthi izitshudeni ezingu-139 928 zigcine zingaqhubekanga nezicelo zoxhaso.
“Izitshudeni ezingu-114 198 zikhale ngaphansi zangaluthola uxhaso lomfundaze lweNSFAS. Sisathole izikhalazo zezitshudeni ezingu-1 213 ezifuna kubuyekezwe izicelo zazo. Sisalinde izimfanelo ezithile, okubalwa nobufakazi obuthinta imali eholwa emakhaya kulezo zitshudeni ezisalinde uxhaso.”
Amalungu ekomiti akhale ngokuthi kuqalile ukufunda kuleli sonto ezikhungweni eziningi kuleli, kanti lezi zitshudeni zilinde into ezingayazi.
UMnuz Mandla Shikwambana we-EFF, ukhale ngokuthi ezikhungweni eziningi izitshudeni zilala ngaphandle, azibhalisile ngoba zingazitholile izimpendulo.
Uthe lokhu kubambezela kuzokwenza ukuthi izitshudeni zize zivuke umbhejazane, ziteleke ngoba zilinde umnyama ongenafu.
“Ezikhungweni eziningi izitshudeni zilala phandle ngenxa yokuthi azixhasiwe. Zilinde into ezingayazi ukuthi izofika nini ekubeni uFebhuwari usuphakathi sekuqaliwe nokufunda.”
Usihlalo wekomiti uNksz Nompendulo Mkhatshwa, utshele izikhulu zoMnyango weMfundo ephakeme kanjalo nezeNSFAS ukuthi abantu bazitshela ukuthi ayikho into yamahhala.
Uthe bazitshela ukuthi yiphupho nje ngoba izitshudeni zize zibhikishe nje ngenxa yokuthi ziyaphuza ukuthola uxhaso.
“Izitshudeni ziyaphuza ukuxhaswa, zize zilahle ithemba. Yingakho zize zicabange ukuthi yinto engekho eyemfundo yamahhala.”
URamorwesi uthe bayikhipha imali bayinika izikhungo ukuthi zilungise eyalabo abebekweleta nyakenye.
Uveze ukuthi kumele balandele imigomo ebekiwe ngaphambi kokuxhasa izitshudeni.
Ubalule nokuthi ohlelweni lokuxhasa izitshudeni ezithathwa ngokuthi abazali bazo bahola kakhulu, abangalutholi uxhaso lomfundazwe lweNSFAS kodwa abazobolekwa imali abazoyibuyisa uma sebesebenza, bathole izicelo ezingu-22 954 zoxhaso.
Uthe izicelo zalolu xhaso zivalwa namhlanje.
“Okwamanje sisaxhase izitshudeni ezingu-139 ngaphansi kwabathathwa ngokuthi abazali babo bahola kakhulu (missing middle). Abangu-12 890 sisalinde ukuthi balethe olunye ulwazi.
Abangu-841 bahoxise izicelo zoxhaso, abangu-8 345 ababange besaqhubeka nokufaka izicelo zoxhaso bagcine ngokuvula amaphrofayli kuphela, bangazifaka izicelo.”
Uthe bachithe abangu-476 abangalutholanga uxhaso, abahlanu bafake izimangalo, bafuna kubuyekezwe izicelo zabo.
Uveze nokuthi bangu-791 405 abaxhasiwe abahola imali yesibonelelo sakwaSASSA, abangu-198 593 abaxhasiwe abasiholi lesi sibonelelo.
Ucwaningi mabhuku jikelele kulo mhlangano ukhale ngokuba yinhlakanhlaka kwamabhuku alesi sikhwama njengoba sathola umbiko ongemuhle wezimali.