Kudutshulwe kwabulawa abesilisa ababili, omunye waphuthunyiswa esibhedlela enenqwaba yamanxeba okudutshulwa eMontclair, eThekwini, ngoMgqibelo ebusuku.
Lesi sigameko kuthiwa senzeke emgwaqweni uRadcliffe.
Abezimo eziphuthumayo bakwa-ALS Paramecids Medical Services, bathe bathole inqwaba yezingcingo ngaphambi kancane kokuthi kushaye u-9 ebusuku.
Ngesikhathi befika endaweni yesigameko kanye kanye nabakwa-EMRS, bafike amaphoyisa esekhona futhi evale indawo.
Bathe babe sebekhonjiswa imoto ebinenqwaba yezimbobo zenhlamvu kuyo.
“Abezimo eziphuthumayo bathole abesilisa abathathu emotweni base beyabahlola. Ngebhadi ababili okukholakala ukuthi iminyaka yabo iko-30 bebenenqwaba yamanxeba okudutshulwa emzimbeni, futhi kuqinisekiswe ukuthi bafile endaweni yesigameko. Omunye wesilisa naye okukholakala ukuthi uneminyaka eko-30, ubenenqwaba yamanxeba okudutshulwa esesimeni esibucayi,” kusho abe-ALS.
Bathe bamxilongile ngaphambi kokuthi aphuthunyiswe esibhedlela.
Imbangela yalesi sigameko bathe ayaziwa kodwa amaphoyisa asaphenya.