KUHLASELWE kwabulawa ngesihluku amalungu amane omndeni owodwa okukhona kuwo nomsebenzi kuMasipala waseMtubatuba, esigamekweni okuthiwa senzeke ezintatha zanamhlanje endaweni yakwaMtholo ku-ward 16 ngaphansi kwalo masipala.
Izidumbu, esikaNksz Nokuthula Dlamini (42) okuthiwa ubesebenza njenge- Community Development Worker endaweni, unina uNkk Thembisile Dlamini (60) nezingane ezimbili uSanele Dlamini no-Alondwe Khanyile onezinyanga ezintathu, kuthiwa zitholwe zishiswe nendlu emva kokuthi kuvele ukuthi bahlaselwe badutshulwa ngabasolwa abangaziwa, okuthe uma beqeda ukubadubula bokhela ngomlilo indlu abebelele kuyo.
UMnyango wezokuBusa ngokuBambisana nobuHoli boMdabu KwaZulu-Natal usigxekile lesi senzo.
“Sekuyisikhathi sokuthi izinhlaka zezokuphepha zenyuse amasokisi ukulwa nobugebengu. Sinxusa ukubambisana kuzona zonke izinhlaka ukunqanda izigameko ezinjengalesi. Lesi senzo esiwubulwane nodlame, asinayo indawo emphakathini wethu,” kubhalwe esitatimendeni.
Amaphoyisa aKwaZulu-Natal athi sekujutshwe ithimba labaphenyi ezingeni lesifunda nesifundazwe ukuphenya ngalesi sigameko ngenhloso yokuthi kuboshwe izigilamkhuba ngokushesha.