IZOHANJELWA yiloyo owayenguMengameli wezwe laseNingizimu Afrika, uMnuz Jacob Zuma inkonzo enkulu yenhlangano ebizwa ngokuthi yiLast Move Revival eyandulela iPhasika kuleli sonto.
Lokhu kudalulwe yiloyo onguSihlalo wale nhlangano, uMphostoli Sifiso Khuzwayo. Kule nkonzo kuzobuye kukhulekelwe nokhetho lakulo nyaka.
Uveze ukuthi lena kuzoba yinkonzo enkulu ezoqala ngoLwesihlanu ize iphothulwe ngoMgqibelo ntambama.
Uveze ukuthi iLast Move, inkonzo izobe iyenza ngokuhlanganyela nenhlangano, iSouth Coast Pastors Fraternal.
Kuzokube kugxunyekwe itende elikhuliu enkundleni yezemidlalo yaseLovu, KwaGabela.
Inhlosongqangi yayo uthe ukuhlanganisa abefundisi kwenziwe amazwi ayisikhombisa ngaphambi kwephasika, ebese kulalelwa uMnuz Zuma ekhuluma nezinceku zenkosi.
"Simeme uMsholozi ukuze ezokhuluma kabanzi nabefundisi mayelana nendima okufanele iklanywe yibona abefundisi ezweni. Kuningi okunye azokhuluma ngakho uma esehlangene nabefundisi,'' usho kanje.
Baningi kakhulu abanye abefundisi abaziwayo kakhulu okulindeleke ukuba babe yingxenye yale nkonzo.
Phakathi kwabo kubalwa uMphostoli PD Ngcobo, uMbhishobhi PR Chiliza. Umbhishobhi S. Ngcobo, u-Archbishob T Nxumalo, uMbhishobhi S Thabethe, uMbhishobhi D Ngobese noMbhishobhi N. Nkwanyana.
Bonke bazoshiyelana inkundla bashumayele ngamazwi ayisikhombisa ngoLwesihlanu.
Kulindeleke ukuthi ngoMgqibelo uMsholozi ethule inkulumo ayibhekise kubefundisi.