BASALE beshaqekile abasendimeni yebhola likanobhutshuzwayo KwaMashu ngokudlula emhlabeni kukaNkemelle “Rasta” Ntsoane obengumqeqeshi abuye abe yisikhulu sebhola kuleli lokishi.
UNtsoane, ongumfowabo omncane kaTsepo Ntsoane wodumo kwiLamontville Golden Arrows ne-Orlando Pirates, waba nesandla esikhulu ekucijeni amakhono oThalente Mbatha we-Orlando Pirates noThabo Cele weKaizer Chiefs. Wadlala kwi-African Wanderers eminyakeni edlule eyibamba noMandla Ncikazi oseyiphini lomqeqeshi wePirates.
UMbatha noCele, asebehlonishwa iNingizimu Afrika yonke, badlule esandleni sikaNtsoane kwiKwaMashu All Stars eyayidlala kwi-ABC Motsepe League abadlale kuyona ngaphambi kokuthola amadlelo aluhlaza.
UNtsoane ushonele esibhedlela izolo kulandela ukuwa kwakhe enkundleni edlala emidlalweni yabaneminyaka engaphezu kuka-35 ezinkundleni iJohn Dory, eNewlands, emasontweni amabili adlule. Kusukela lapho uNtsoane uhlale egumbini labagula kakhulu esibhedlela kwaze kwaba kuyamenela izolo.
Ukudlula emhlabeni kukaNtsoane, obengumengameli weKwaMashu Football Association, kuqinisekiswe yiqembu abelidlalela, iCrocodille FC.
“Ezibuhlungu azipheli. Ngokukhulu ukuzithoba sicela ukubikela wonke amaqembu kasoseshini ngezindaba ezibuhlungu zokudlula emhlabeni kukamfowethu uNkemelle Ntsoane,” kusho umyalezo othunyelelwe wonke amaqembu kalo soseshini.
“UNtsoane uyilwile impi yakhe kwaphela wona amandla ngoMsombuluko esibhedlela. Umndeni uthembise ukusitshela konke okuzokwenzeka mayelana nezinhlelo ngokufihlwa kwakhe,” kuphetha umyalezo othunyelelwe amaqembu."
Nyakenye ngesikhathi uMbatha esayina kwiPirates, uNtsoane uhluleke nawukuzibamba yinjabulo. Kwenzeke okufanayo ngesikhathi eshaye amagoli kwiBafana Bafana. Ngesikhathi leli phephandaba likhuluma naye ngakubo KwaMashu, uthe ubona lo mdlali kumfanele ukudlala kumaligi aphezulu emhlabeni. UNtsoane uphinde wazwakwalisa injabulo edlulele ngesikhathi uCele esayina kwiChiefs ngoJanuwari. Utshele leli phephandaba ukuthi indlela uCele angene khaxa ngayo kwiChiefs, kuzogcina kudanselwa isigingci sakhe.