AMAPHOYISA aseWestville, athungatha umkhondo wabasolwa abadubule babulala iphoyisa ngesikhathi behlasela izitolo zobucwebe ngeSonto emini ePavalion.
Kuthiwa kungene indoda eyodwa esitolo izenza ikhasimende kwathi kusabhekwe lokho, kwatheleka amanye amane.
“Abasolwa bahlule abasebenzi ngamandla babutha ubucwebe benani elingaziwa okwamanje,” ngokombhalo wesitatimende samaphoyisa.
Kuthiwa nakwesinye isitolo sobuicwebe kwenzeke esifanayo endaweni eyodwa. Kuthiwa ngenkathi sebephuma abasolwa, babone imoto yamaphoyisa abangabe besapholisa maseko bavulela kuqala ngenhlamvu.
UGarrith Jamieson, okhulumela abe-ALS Paramedics, uthe iphoyisa elilodwa liphuthunyiswe esibhedlela ngemuva kokudutshulwa ngabasolwa ngesikhathi bephuma enxanxatheleni.
"Iphoyisa lithole amanxeba okudutshulwa laphuthunyiswa esibhedlela lisesimeni esibucayi. Ngeshwa ligcine lishonile ngenxa yokulimala,“ kusho uJamieson.
Kuvela nokuthi abasolwa baphuce onogada ababili izibhamu zabo. Babaleke ngezimoto ezimbili, iveni enkulu neToyota Etios esiliva ngombala.
Amaphoyisa acela amalungu omphakathi angaba nolwazi ngabasolwa ukuba abike ukuze babanjwe.