UGQEMEKE engeqiwa ntwala owayengumengameli wezwe uJacob Zuma neqembu elisha uMkhonto weSizwe, ngesikhathi iNkantolo yoMthethosisekelo inquma ukuthi akayi ePhalamende.
IJaji Leona Theron ebeliphelezelwa amanye amajaji likhiphe isinqumo esilahla uZuma ngoMsombuluko ekuseni.
I-IEC yamemezela ukuthi uZuma akafanelwe wukuba sohlwini lwabaya ePhalamende ngoba walahlwa ngecala wagwetshwa wanganikwa nethuba lokukhokha inhlawulo.
Abe-MK basedlulisa isinqumo yafika yabavuna iNkantolo yezoKhetho kodwa i-IEC yalwedlulisa udaba ithi ayenelisekile. IJaji uTheron, uthe kumile ukuthi uZuma walahlwa ngecala wagwetshwa futhi akakwazi ukuya ePhalamende.
“ I-IEC isuke ihlunga abantu abaya ePhalamede ukuze kuvikelwe isithunzi sombuso wentando yeningi. I-IEC inamandla okwenza lowo msebenzi wayo ngaphambi kokuthi kubunjwe iPhalamende,’’ kusho iJaji uTheron.
IJaji lilibeke ngembaba elokuthi isinqumo seNkantolo yezoKhetho siyachithwa kuzobe sekusebenza eseNkantolo yoMthethosisekelo.