ASABELE ikhwelo likaMengameli Cyril Ramaphosa, lokuthi kuthengwe ingqephu ekhiqizwe kuleli amalungu ePhalamende ngoba izolo abehlobe ngemisiko eyenziwe kuleli.
Ngokusho kwePhini likaNgqongqoshe wezokuHlaliswa kwaBantu, uNkk Pam Tshwete, kubalulekile ukuthi kugqokwe impahla eyenziwe eNingizimu Afrika, ukuze kudaleke amathuba omsebenzi.
Uthe uma kugqokwa impahla eyenziwe kuleli, umnotho uyakhula futhi kudaleka namathuba omsebenzi embonini yendwangu neyemfashini.
Ibikhona nenhlangano egqugquzela ukuthengwa kwempahla eyenziwe kuleli iProudly South African, igqugquzela ukuthengwa kwempahla yakuleli.
Ingqephu ibidida unwabu njengenjwayelo, eziphaqule kahle amalungu ePhalamende esifazane.
Okuphawulekayo kulokhu wukuthi namalungu ePhalamende esilisa ebewudlile ukotini, engagcinanga icala.
UNgqongqoshe wezokuMbiwa phansi namandla, uMnuz Gwede Mantashe ubonakale neshethi elinemibala, ebemlihlala kahle emzimbeni.
Abanye besilisa bebegqoke okubalinganayo yize iningi beligqoke imibala engagqamile.