WONKE amabombo abathandi bomculo wesicathamiya abheke kwiNational Isicathamiya Competition ePlayhouse Opera Theatre, eThekwini ngoSepthemba 21 kusukela ngo-6 ebusuku.
Kuzodela umakhasana ozozibonela ngawakhe izingqungqulu zalo mculo zidlana imilala ngalolu suku.
Kulindelwe amaqembu azobe eliqhamukisa ezifundazweni ezihlukahlukene, okuyiKwaZulu-Natal, Gauteng ne-Eastern Cape.
Emaqenjini okulindeleke ukuba abambe iqhaza kubalwa iRoyal Messengers, Umzumbe Lover Boys, iCombination Brothers, i-Easy Walkers, iNyuswa Home Boys, OBen 10 Bodumo, iNdwedwe Perfect Boys, Xolo Can't Get, James Black Birds, Pomeroy Gordon Stars, Ndwedwe King Boys, Inkululeko, iNdwedwe Original, Nombika Black Boys, Vela Brothers, Khalabai Boys, NMZ Combination, Abafana Bokuthula, Thokoza, Nkandla Lucky Stars nabanye.
Izithameli azigcini ngokuzitika ngomculo kodwa zibuye zibukele umqhudelwano wengqephu njengoba kusuke kuncintisana onobuhle noswenka, abasacathula nasebemnkantshubomvu.
Umholi weZulu Messengers, uSkhumbuzo "Mavulakuvaliwe" Mhlongo, uthe konke sekumi ngomumo ngalolu suku.
Omunye wabagqugquzeli balo mqhudelwano, uKhulekani Kunene, uthe amathikithi aseyatholakala eWebtickets ngoR100.
