IBHOKE ngolaka intokazi yakuleli engumculi oshisa izikhotha ngemidanso yakhe uMakhadzi ngobuxoki babantu bakuleli ngokweseka umcimbi kaChris Brown kunowakhe.
Le ntokazi ikhala nje ihlela umcimbi waminyaka yonke i-One woman Show, ePeter Mokaba ngomhla ka-21 Disemba 2024.
Le ntokazi inikele enkundleni i-X ngoLwesibili ebusuku ikhala ngokuthi amathikithi ekhonsathi kaChris Brown adayise kuhle kwamagwinya ashisayo, kodwa awomcimbi wakhe ahamba ngonyawo lonwabu.
“INingizimu Afrika ifilimu mina kumele kungithathe iminyaka eyishumi ukudayisa amathikithi enkundla iPeter Mokaba, kodwa uChris brown nimupha amahora amabili kuphela,” kubhala yena.
Uqhubeke wanxusa ukuba kuthengwe amathikithi omcimbi wakhe. Abantu baphendule kanje:
@Esonasihle: Amathikithi akho azophela, ngeke nje kuthathe isikhathi esifanayo noChris Brown. Ungaziqhathanisi, nawe ukhethekile kubantu baseNingizimu Afrika ngendlela yakho eyingqayizivele nenhle. Udinga ukubekezela❤️ Uzothengisa ngaphambi komcimbi wakho.
@lindamnkhonto: Makhadzi awuyena uChris Brown. UCassper Nyovest #FillUp naye kwamthatha izinyanga ezimbalwa ukudayisa amathikithi. Uzoyigcwalisa inkundla, uphumule futhi uqhubeke nokumaketha umbukiso wakho.
@MissManjo: Sisi, uChris Brown usenesikhathi eside kunawe futhi umculo wakho akuwona owawo wonke umuntu. Linda ithuba lakho, uChris usebenze kakhulu ukuthi afike lapha. Kahle ngamatshe.
@ZuluSabs: Ungakhathazeki nkosazana, uzowadayisa amathikithi akho, phela wena abantu bangakubuka kaningi kodwa ukufika kwale nsizwa yithuba eliyingqayizivele!
Amathikithi ekhansathi kaChris Brown ezoba senkundleni iFNB ngomhla ka-14 Disemba adayisa aphela kwaze kwaphoqeleka ukuthi kuhlelwe usuku lwesibili olungumhla ka-15 Disemba.
