KUZOBONAKALA ubuso obusha ohlelweni olwenzeka ngempela nolushaya ibuya nesizini yesithathu, iReal Housewives of Durban (RHOD).
Yize ababukeli besenokuqagela ukuthi ngobani ababuyayo kule sizini kodwa Isolezwe ngeSonto lingakuveza ukuthi umlingisi, uMbali Ngiba, ungomunye wabazobonakala kulolu hlelo.
Umthombo, oputshuzele leli phephandaba lezi zindaba, uveze ukuthi lo mlingisi usezinhlelweni zokuqala ukuqopha nalolu hlelo olubuyayo maduze.
“UMbali ungomunye ozovela kulolu hlelo kanti nokuqoshwa kohlelo sekuseduze kuqale. Kukhona-ke nabangeke besabuya kodwa kuzomenyezelwa maduze,” kusho umthombo.
Uqhube wathi uLa Conco, osengumethuli wohlelo, i-Our Perfect Wedding, ngeke abonakale kule sizini ezayo.
UMbali wazakhela igama ekulingiseni ngemidlalo yeshashalazi waphinde wabonakala emidlalweni yethelevishini okubalwa Abangani, iGreed & Desire neThe River.
Ethintwa, uqale wahleka wabe esephendula ngokuthi uqala ukuyizwa ngentatheli le ndaba, maqede wavala ucingo.Isizini edlule yeRHOD ephele ngoMeyi, ibibophele uSorisha Naidoo, Nonkanyiso “LaConco’ Conco, Annie Mthembu, Nonku Williams, Thobile MaKhumalo Mseleku, Londie London noJoJo Robinson.
Ezinkundleni zokuxhumana abalandeli balolu hlelo sebezwakalise kaningi izimvo zabo zokuthi bafuna kubuye bani nokuthi kwengezwe ngabaphi osaziwayo.
KuTwitter uJojo (@jojo03216) uthe: “UJojo noThobile kumele badedelwe. Okungenani kubuyiswe u-Ayanda Ncwane noma kufakwe uZama Gcaba Mabaso noma uGugu Khathi”.