UMLINGISI wakuleli, uKhaya Dladla, uthi ubone kungcono agxile emdlalweni omusha azobonakala kuwo maduzane othi House of Zwide ngoba belingacacile kahle ikusasa lakhe emdlalweni uZalo.
Exoxa neSolezwe izolo, uKhaya uthe uthathe isinqumo ebesingelula kodwa ukhethe lo mdlalo ngoba inkontileka anayo ngeyesikhathi eside kunaleyo abenayo noZalo futhi ubengazi ukuthi ikusasa limphatheleni kulo mdlalo.
Ungomunye wabalingisi abazobonakala kwiHouse of Zwides ezokhonjiswa ku-e.tv kusukela ngoJulayi 19.
Lo mdlalo uzovala isikhala seRhythm City ephelayo kule nyanga.
Kuwona uzobe elingisa indawo kaLazurus osemkhakheni wezemfashini nabakwaZwide, noyisithenjwa kubona uma bengekho.
"Ngesikhathi sibuyela kuZalo, abasitshelanga ukuthi sizohlala isikhathi esingakanani mina noNoxie. Abanye ozakwethu babazi ukuthi bazobonakala amasonto ambalwa bese beyahamba. Ngakho ngesikhathi sekuvela leli thuba bengingeke ngiliyeke yingakho ngikhethe ukuthi ngijoyine lo mdlalo engaziyo ukuthi kuwona ngizohlala iminyaka,“ kusho uKhaya.
Uthe angeke aqinisekise ukuthi ngeke angiphinde abonakale kuZalo njengoba kukhona iziqephu aziqophile ezisazobonakala.
Uthe esinye isizathu ukuthi bekuzomgqilaza ukushutha emadolobheni aqhelelene.
Uthe indawo yakhe kulo mdlalo izokhombisa ababukeli olunye uhlangothi lwethalente lakhe emkhakheni wokulingisa.
“Le ndawo ayifani neze nale abantu abake bangibona kuyo kuZalo nasemdlalweni othi Ehostela, bazophinde babone elinye ikhono lami. Kulo mdlalo ngifike ngazi lukhulu ngomkhakha wemfashini. Ngisizwe kakhulu ngabasiki bengqephu engibaziyo. Bengibafonela uma kukhona engingakwazi, bangitshele ukuze ngikhulume ngento engiyaziyo,“ kuchaza yena.
Kulo mdlalo uKhaya uzobe elingisa nabalingisi asebemnkantshubomvu abafana noVusi Kunene, Winnie Ntshaba, Motlatsi Mafatshe noJeffrey Sekele.
Ubuso obusha obuzobonakala kulo mdlalo kubalwa obezintokazi ezisencane, uNefisa Mkhabela noShalate Sikhabi.