OMUNYE wabalingisi abahamba phambili kuleli, uWiseman Mncube, uzohlanganyela ajabule nabantu ababambe iqhaza empumelelweni yakhe kusukela engena kulo mkhakha.
UWiseman (34) wasoLundi usezakhele udumo ngezindawo eziqavile abezilingisa kuZalo, My Brother's Keeper, The Kingdom-Ukhakhayi, The Wife, Shaka iLembe, eHostela, Gold Diggers, Generations The Legacy, Mandoza Biopic, Sokhulu & Partners, Ring of Lies, Rage of a Lioness, The Turning Point, Liberty, Ingozi neMamello.
Uthe uzokwenza umcimbi wokujabulisa bonke ababe nesandla empumelelweni yakhe. Umcimbi uzoba seStable Theatre eThekwini ngo-Ephreli.
Ebuzwa yiSolezwe Ngempelasonto ukuthi yibaphi labo bantu azobe ejabula nabo ngalolu suku, uWiseman uthe usematasatasa nokuhlanganisa uhlu lwabo bonke.
"Uhlu olugcwele luzolandela kodwa kuzobe kumnandi ukuba khona kulo mcimbi."
Uthe nje ufuna ukubathulela isigqoko bonke abantu ebebemthandazela.
"Kodwa isibalo sabantu abazothamela umcimbi ngeke sibe ngaphezu kuka-200. Ngakho kuzolandelwa imigudu yokuthi indawo izobekiswa kanjani."
UWiseman uqale ukugqama endimeni yokulingisa ngo-2016.
Njengamanje ulingisa indawo kaSbonelo kuZalo oluvezwa kuSABC 1 ngo-8.30 ebusuku nekaNqubeko Shabalala kwiMy Brother's Keeper ekhonjiswa kuMzansi Magic phakathi nezinsuku ngo-7.30 ebusuku.
UWiseman ulamana noNtando Mncube obenguBhekile kwiFalakhe no-Omega Mncube onguPhelelani kuZalo. Ngaphandle kokulingisa, ubuye abe wumculi osanda kukhipha ingoma yegqom' ethi: Pick & Choose noVukani Khoza weSkomplazi.