UMLINGISI osanda kujoyina iSitha: The Enemy, uThabisile Zikhali, uthe ababukeli balo mdlalo abakaboni lutho endaweni ayidlalayo.
“Abantu kufanele balinde izigemegeme zodwa kuMinenhle. Ngiyazi ukuthi bazokuthanda ukuguquka kwalo mdlalo ngoba ngizoyiphilisa kakhulu le ndawo. Ababukeli bazokhumbula uMinehle ecela umndeni kaKhaya ukuthi angasiza yini ekuhlelweni inkonzo yesikhumbuzo. Baqala banqaba kodwa bagcina bemvumele ukuba abambe iqhaza.”
UThabisile uthe kuthe uma uMinenhle efika enkonzweni yesikhumbuzo wakhuluma ngokwedelela ngobudlelwano bakhe noKhaya phambi komndeni nomphakathi. Le ntokazi edabuka KwaMashu, ibuye yadalula ukuthi ikhuza ibuya kuZalo ngesonto elizayo.
UThabisile uthe okumenza ehlale ethola imisebenzi futhi eqokwa emiqhudelwaneni ukuthi uyakholelwa ekusebenzeni ngokuzikhandla, ukuzibophezela nokubekezela njengoba kuyikho okumphumelelisayo.
Ukhuluma kanjena nje, useqokwe kaningi emiqhudelwaneni yasemazweni ase-Afrika enjengoShinning Star Africa Awards neZikomo Afrika Awards.
Uthe ujabule kakhulu ngokubungazwa esadla anhlamvana.
"Sengiqokwe ngaphandle kwaseNingizimu Afrika isikhathi esiningi futhi kuyangijabulisa ukubona izwe lami lihlonipha ukusebenza kwami kanzima."
"Kolunye uhlangothi, ngimatasatasa, ngilungiselela ukwethula okuthize okungokwami. Ngingena nakumabhizinisi engingakafisi ukuwadalula. Okusemqoka kakhulu ukuthi ngisetshenziswa wuNkulunkulu ukusiza abantu besifazane ukufeza izinjongo zabo emhlabeni jikelele.“
UThabisile waziwa kakhulu ngokulingisa indawo kaDetective Biyela kuZalo nekaVivian kuThe Queen. Ubuye walingisa kwiBlack Door nakwiRockville.