OWAYEYISILOMO soKhozi FM, uNgizwe "Zulu Charmer" Mchunu, uzosakaza uhlelo lwantambama kwiGagasi FM. Lezi zindaba ziqinisekiswe yisikhangiso salo msakazo ozinze eCornubia Mall kanye naye uNgizwe ngesikhathi ethula inkulumo yakhe kwiNgizwe Online.
Isolezwe lithole ukuthi uNgizwe uzobe esakaza ngokubambisana i-Afternoon Drive nomsakazi walesi siteshi uZisto.
UNgizwe wazakhela ugazi ngokusakaza uSigiya Ngengoma kuKhozi FM eminyakeni eyedlule ngaphambi kokukhonjwa indlela ngo-Okthoba 2018. Ubuciko ayebusebenzisa uma esesakaza kwaze kwamenza wethula uhlelo lomculo wesintu noTeboho Mahlaela kuSABC 1,iRoots ngemiGqibelo ntambama.
Igcagcele esokeni emabhinceni njengoba kade ayefuna uNgizwe ajoyine lo msakazo. Empeleni baningi abantu bephakamisa ukuba iGagasi libe nohlelo lukamaskandi oluzosakazwa wumfokaMacingwane. Kuliqiniso elingephikwe ukuthi uNgizwe unekhono namava kulo mkhakha wezokusakaza. NasoKhozini ubengasakazi uhlelo lomculo wesintu kuphela kodwa ubebuye abambe nezinye zangezintathakusa. Wabuye wathola ingqayizivele yokusakaza uSigiya Ngengoma esemazweni aphesheya kwezilwandle. Ikhono lakhe laze lamenza wamenywa nasemcimbini wokugcotshwa kukaMengameli wokuqala omnyama waseMelika, uBarack Obama. Akagcinanga lapho kodwa ubuye wawola imiklomelo kumaSouth African Traditional Music Achievement (Satma) Awards. Ukuba wungoti olimini lwesiZulu kumenze wangena nasenhlanganweni yongoti bezilimi zesintu, uMzukazwe.