UBADONSE ngendlebe ukuthi bagweme amaphutha abadlali bakhe umqeqeshi weSekhukhune United, uBrandon Truter, uma sebedlala koweCaf Confederation Cup ngempelasonto.
Uthe kumele bakuyeke ukumosha amathuba abawakhayo njengoba benzile begcina behlulwa iKaizer Chiefs ngo 2-1 koweDStv Premiership, eMoses Mabhida Stadium ngoLwesithathu.
IBabina Noko ihambe phambili sekuzoyiwa ekhefini ngegoli lika-Elias Mokwana eMabhida. Nokho iChiefs ibuyile ngesiwombe sesibili yalinganisa ngegoli lika-Edson Castillo ngaphambi kokuthi u-Edmilson Dove ayinqobele amaphuzu womathathu.
UTruter ukholwa wukuthi bekungamele bahlulwe kulo mdlalo kodwa bazenzela phansi ngokugeja amagoli baphinde benze amaphutha Amakhosi abajezise ngawo.
“Bekufanele sithole okuthile kulo mdlalo. Mhlawumbe ngikhulunyiswa yimizwa kodwa ngicabanga ukuthi sizigwaze ngowethu. Sakhe inqwaba yamathuba kodwa sangawasebenzisa,” kusho uTruter ngemuva komdlalo neChiefs.
IBabina Noko isigxile emlenzeni wesibili womdlalo wokuhlungela amaqoqo eCaf Confederation Cup neSaint-Eloi Lupopo yaseDemocratic Republic of Congo. Isethubeni elihle lokudlulela esigabeni samaqoqo ngemuva kokunqoba umlenze wokuqala ngo 3-1 ePeter Mokaba Stadium.
UTruter uthe umsebenzi asebewenzile uzophelela emoyeni uma bengaphinda abakwenze bedlala neChiefs uma sebebhekene neLupopo eStade des Martyrs, eKinshasa, ngeSonto, ngo-4.30 ntambama.
ILupopo idinga ukunqoba ngo 2-0 ongaphenduliwe ukuze kube yiyona egcine idlulele phambili.
“Emlenzeni wokuqala bekumele sishaye amagoli amahlanu noma ayisithupha. Lena yinkinga esibhekene nayo njengamanje. Empeleni yinkinga yaseNingizimu Afrika, amaqembu ashaya igoli elilodwa noma amabili bese eyama,” kusho uTruter.
“Yebo, sizoya eCongo sihamba phambili ngamagoli kodwa siyazi ukuthi kuzoba nzima. Siyazi ukuthi kuba njani kulo mqhudelwano uma udlala ekuhambeni. Abanye babadlali abakaze babhekane nezimo ezinje.
“Kuyinselelo kodwa yinto okumele ubhekane nayo uma ufuna ukukhula njengomdlali. Sizohlaziya umdlalo odlule bese silungiselela lo ozayo."
Khonamanjalo: ISuperSport izobhekana neGaborone United yaseBotswana emlenzeni wesibili wokuhlungela iCaf Confederation Cup ePeter Mokaba Stadium ngo-7 kusihlwa. Umlenze wokuqala eGaborone waphela zibambene ngo 1-1.