IMPHUMELA yemidlalo yayizolo yeBetway Premiership iphinde yalandisa igidigidi ngaphambi komdlalo omqoka wangoMgqibelo weBetway Premiership ozobe uphakathi kweMamelodi Sundowns ne-Orlando Pirates.
La maqembu okuyimanje ahamba phambili emjahweni wokuba ngompetha bokuqala bale ligi ngaphansi kwabaxhasi abasha, iBetway, azoshukana eLoftus Versfeld ngo-3.30 ntambama.
ISundowns icoboshise abakhaya bayo, iSuperSport United, ngo 3-0 eLoftus Versfeld. Igoli lokuqala lishaywe nguJayden Adams, amabili aqhamuka kuTashreeq Matthews.
Uhambo lwePirates lwasePolokwane lube yimpumelelo njengoba ibuye nawo ephelele amaphuzu, ithela phansi iSekhukhune United ngo 2-1 e-Old Peter Mokaba Stadium.
Amagoli eZimnyama ashaywe nguDeon Hotto noMakhehleni Makhaula, kwathi eleBabina Noko lavalelwa phakathi nguLinda Mntambo.
Le miphumela ishiye amaSandawana esicongweni ngamaphuzu angu-39 emidlalweni engu-14, kuthi iPirates ilandele endaweni yesibili ngamaphuzu angu-33 emidlalweni engu-13.
Lokhu kuchaza ukuthi uma ezikaMagebhula ziwunqoba umdlalo wangoMgqibelo zizosala ngamaphuzu amathathu, ekubeni zisanomdlalo ezingakawudlali.
Kuliqiniso elingephikwe ukuthi iPirates ilikhuphulile izinga kwiligi kule sizini, nokwenza iqhubeke nokuhlala ezithendeni zamaBrazilians sekudlalwe cishe isigamu sesizini.
Bese kuyinjwayelo ukuthi ngalesi sikhathi sesizini leli qembu elizinze eChloorkop, lisuke selizihambela lodwa phezulu kodwa kulokhu amaBhakabhaka azongena enkundleni azi ukuthi angafaka ingcindezi enkulu kompetha.
Nokho, umlando ukhomba ukuthi yize iPirates ikwazile ukuyishaya iSundowns emidlalweni yomkhumulajezi eminyakeni edlule, ithwala kanzima uma kufanele ithathe amaphuzu kweyeligi.
Umdlalo wokugcina weligi phakathi kwalawa maqembu waphela ebambene ngo 1-1 ngoFebhuwari nyakenye. Ngaphambi kwalokho, iSundowns yayizidlele amahlanga kwiPirates, iyiqumba phansi emidlalweni eyisikhombisa yeligi ilandelana.
EZimnyama zagcina ukunqoba amaBrazilian koweligi ngoJanuwari ka-2020, ziwadlela e-Orlando Stadium ngo 1-0 ngegoli likaGabadinho Mhango.
Kuzoba nzima kakhulu njengoba zizobe zisekuhambeni ngoMgqibelo, kwazise zagcina ukushaya iSundowns ePitoli, ngoJanuwari ka-2018, ziyiqumba phansi ngo 3-1 eLoftus Versfeld.
Iqembu likaMiguel Cardoso lisanqotshwe kanye kwiBetway Premiership kule sizini. Lashaywa yiPolokwane City ngo 1-0 ngo-Okthoba, nyakenye, izintambo zisabanjwe nguManqoba Mngqithi.
Umqeqeshi wePirates, uJose Riveiro, kufanele enze osekuhlule inqwaba yabaqeqeshi kuleli, anqamule irekhodi leSundowns lokunqoba imidlalo eyisishiyagalolunye yeligi ilandelana.
Uma kungenjalo, angasheshe anciphe amathuba eqembu lakhe okuba ngompetha beligi okokuqala selokhu lagcina ngesizini ka-2011/12.