UMQEQESHI weRoma, uJose Mourinho, wenqabile ukusayina kwi-Al-Ahli yaseSaudi Arabia ebizimisele ngokuvala ngaye isikhala sikaPitso Mosimane.
UMourinho (60), odume ngelika “The Special One”, kuvela ukuthi uhlanganile nomengameli we-Al Ahli, uWaleed Muath, eLondon, kuleli sonto njengoba lesi sikhulu besizimisele ngokweshela lo mqeqeshi asayine kuleli qembu elizobe ligijima kwiSaudi Pro League ngesizini ezayo.
Nokho, kuthiwa uMourinho wenqabile ukusayina inkontileka naleli qembu laseSaudi Arabia, nokusho ukuthi ngesizini ezayo uzoqhubeka nokuqeqesha iRoma egijima kwiSerie A yase-Italy.
I-Al Ahli izithola isichithwa wuMourinho nje akukapholi maseko yehlukane noMosimane, oyikhuphulele kwiSaudi Pro League.
Usule enezikhalo ngokungaholi izinyanga ezine engatholi namabhonasi abethenjiswe wona nethimba lakhe labaqeqeshi. -SkySports