KUBIKWA ukuthi umqeqeshi weMoroka Swallows, uSteve "Mphathi" Komphela, ushaya phansi ngonyawo akafuni ukudedela unozinti, uDaniel Akpeyi, okuthiwa ufunwa ngamanye amaqembu.
Isolezwe Ngempelasonto elinguzakwaboSolezwe lisanda kubika ukuthi lo nozinti ozakhele igama kwiKaizer Chiefs, ungomunye wabafunwa ngaMaZulu.
Elinye iqembu okuvela ukuthi limgaqele yiSekhukhune United.
U-Akpeyi (36), oke wavimba nakwiKaizer Chiefs, ufike kwiZinyoni ngoJanuwari. Usayine inkontileka yokuqedela imidlalo ebisele. Beyihambisana nombandela wokuthi ivuselelwa ngesizini eyodwa.
Kuphele isizini edlule sekunguye okhonya ezintini zeqembu.
Ngokuthola kwephephandaba lo nozinti ubenganeme neze ngemali abeyihola ngesizini edlule.
Kuvela ukuthi uyamukele ngoba bese kuphele isikhathi eside engadlali ngemuva kokuthi echithwe iChiefs.
Umthombo uqhube wathi, kuthe uma kuphela isizini lo mdlali nomphathi wakhe bahambisa isicelo kubaphathi beSwallows sokuthi anyuselwe umholo ngesamba esithile.
Kuthiwa ubuholi beZinyoni buthe ngeke bukwazi ukumkhokhela lesi samba. Buyalele laba ukuthi babe befuna iqembu elingakwazi ukukhokha lesi simba, ngeke bame endleleni yalo nozinti.
Umthombo uqhuba uthe akuphelanga sikhathi esingakanani kwase kwaqhamuka uSuthu, oluthe lungakwazi ukukhokhela u-Akpeyi imali ayifunayo.
Uqhube wathi umphathi wezindaba zalo mdlali ubuyele kwiSwallows eyazisa ngalezi zindaba. Kuthiwa izikhulu zayo zishaye phansi ngonyawo zathi ngeke zikwazi ukumdedela ngoba ufunwa kakhulu nguKomphela.
"Into okubhungwa ngayo njengamanje ukuthi u-Akpeyi akhokhelwe imali ayifunayo. Kubukeka kuzoyiphoqa iSwallows ukuthi imkhokhele lesi samba. UKomphela uthi u-Akpeyi akayi ndawo, ungomunye wabadlali afuna ukugadla ngabo ngesizini ezoqala. Uchazwa ukuthi ungunozinti onamava ngoba uke wavimba naseqenjini lesizwe langakubo eNigeria. Ngaphandle kwalokhu, nangesizini edlule uvimbe kahle kakhulu," kubeka umthombo.
U-Akpeyi ulime indima enkulu ngesizini edlule ekutheni iZinyoni zisuke emaqenjini abesekugcineni. Zisonge sezikweyesishiyagalombili ngamaphuzu awu-40. UKomphela obengomunye wabaqeqeshi beMamelodi Sundowns, isizini ka-2023/24 uzoyivula ngomdlalo weLamontville Golden Arrows ngo-Agasti 5, eMpumalanga Stadium, eThekwini.
UDavid Mogashoa ongusihlalo weSwallows ebuzwa ngodaba luka-Akpeyi, uthe : “Lokhu ongibuza kona angikwazi. Engingakusho nje ukuthi uDaniel Akpeyi ungumdlali weSwallows.”