Richards Bay FC (0) 0
Stellenbosch FC (0) 0
IRichards Bay FC ithole iphuzu elimqoka ibambana neStellenbosch FC emdlalweni weBetway Premiership obudlalelwa eKing Zwelithini Stadium, eMlaza, ngoMgqibelo ntambama.
Womabili la maqembu abeze kulo mdlalo eshayela phezulu kulandela ukunqoba emidlalweni yakamuva yeCarling Knockout. IBay iwashise ijezi iSekhukhune United kowe-Last 16, iStellenbosch yakhipha AmaZulu FC.
Womabili amaqembu awatholile amathuba okufika emapalini ngesiwombe sokuqala, ikakhulukazi iBay lapho okubonakale khona unozinti weStellenbosch, uSage Stephens, evimba amabhola ambalwa anzima.
Zibuya nje ekhefini iBay yenze izinguquko, kungena uThabiso Kutumela noThulani Gumede ezindaweni zoThando Buthelezi noJustice Figuareido.
UKutumela ongene nomnyakazo, ucishe wathola igoli ngomzuzu ka-56 ngenkathi ibhola abelibekelwe nguGumede livinjwa ngaphakathi ebhokisini sekuyisibhudubhudu.
IBay ekhombise ukuhlasela kakhudlwana ngesiwombe sesibili kodwa yahluleka ukuwasebenzisa amathuba. Kube ngesifanayo nakwiStellenbosch nayo ebilokhu iqhubekile nokuba yingozi uma kuyiwa phambili kodwa iqinile odongeni lwasemuva.
Ukubuya nephuzu kweNatal Rich Boyz kulo mdlalo kukhombisa ukuhlangana nokuba ngcono kwaleli qembu eliqeqeshwa nguBrando Truter othathe izintambo ngaphambi kokuqala kwesizini.
Nakuba lisaqoqe amaphuzu amane kuphela emidlalweni emihlanu esadlaliwe kodwa ukubuya nephuzu kwiStellies esefomini, kufuze ukuba yisikhuthazi kwezikaTruter ezizobhekana neSekhukhune ngoLwesibili ebusuku eMlazi.
Ngakolunye uhlangothi ukunganqobi kweStellies kulo mdlalo kusho ukuphazamiseko komgqigqo wayo njengoba emidlalweni emithathu yakamuva yePremiership ibuye namaphuzu ayisikhombisa, inqoba kwemibili idlala ngokulingana komunye njengoba isiphinde idlala ngokulingana.
Eminye imiphulmela yeBetway Premiership:
Royal AM 2-0 Sekhukhune United; Marumo Gallants 1-1 TS Galaxy