Orlando Pirates (2)2
Mamelodi Sundowns (0)1
I-ORLANDO Pirates ivukuze ithemba kubalandeli ngokufica iMamelodi Sundowns embangweni wesicoco seligi yeBetway Premiership iyehlula eFNB Stadium, eNasrec, ngeSonto.
Amagoli aqinisekise ukuthi amaphuzu amathathu agoduka neZimnyama, ashaywe nguRelebohile Mofokeng esiwombeni sokuqala. EleSundowns lishaywe nguKhuliso Mudau kwesesibili.
IPirates, abaningi abebengayinike lutho kulo mdlalo, ingene enkundleni ibheke ukuthola amaphuzu amathathu ukuze izonciphisa igebe phakathi kwayo neSundowns evule inkebenkebe esesicongweni se-log yePremiership. EZimnyama bezinamaphuzu angu-40, zisele ngawu- 18 kumaBrazilians abezihola ngawu-58. Ukushaywa kweZimnyama ngamaBrazilians emidlalweni edlule, ikakhulukazi oweligi ezibhaxwe kuwona ngo 4-1 emasontweni adlule, kwenze bancipha abazitshela ukuthi zingaliphendukela leli qembu likaMiguel Cardoso. Ngasekupheleni kwesonto eledlule, umgadli wePirates, uTshegofatso Mabasa, ukusho ngokuzethemba ukuthi umbango wesicoco seligi awukapheli. Ngokuwina, iPirates inciphise igebe lamaphuzu lafinyelela ku-15. Isele ngemidlalo emine kwiSundowns.
Enkundleni, iPirates yenze obekungalindelekile iqala umdlalo ngegiya eliphezulu, icindezela iSundowns emuva. Lokhu kusheshe kwathela izithelo ngesikhathi u-Evidence Makgopa ethola ibhola agcine eligobela uMofokeng ebhokisini, walinamathisela phakathi ngomzuzu wesine. Emuva komzuzu, uMofokeng ujezise iSundowns ngephutha elenziwe ngabadlali bayo basemuva, eshayela eZimnyama igoli lesibili. Emuva kwala magoli, iSundowns ikhombise ukuhlangana, izama ukungena emdlalweni kodwa iPirates ibingafuni lutho olufika kunozinti wayo, uSipho Chaine. Ithuba leSundowns eliphakamise amaphaphu litholwe nguGrant Kekana ngesikhathi ibhola lakhe alingqofe kuyikhona lishaya ipali liphumela ngaphandle.
Esiwombeni sesibili, iSundowns ibuye nomfutho isifake u-Arthur Sales endaweni kaPeter Shalulile. Nakuba abafana bakaCardoso bebelokhu bengqongqoze njalo kodwa udonga lwasemuva lwePirates belungafuni lutho. Nokho lugcine libhodlokile ngomzuzu ka-66 ngesikhathi uMudau eqobela phakathi ibhola lika-Iqraam Rayners.