INjampela FC isingene ngaphansi kwengcindezi yokubuya namaphuzu kumnyama kubomvu emdlalweni wayo wokugcina wesigaba samaqoqo ngemuva kokuba i-FN Rangers yaseWestern Cape inenebule iMpheni Home Defenders ngo 4-1.
IRangers isizohola phambili phambili kuGroup A wamaPlay-Offs kazwelonke eSafa ABC Motsepe League, ngemuva kokunqoba lo mdlalo ngoLwesithathu e-Upington, eNorthen Cape.
Ukubhaxatshulwa kweMpheni kuqinisekise ukugoduka ekuseni kwaleli qembu laseLimpopo elisonge, isigaba samaqoqo linephuzu elilodwa kulandela ukubambana ngo 2-2 neNjampela emdlalweni wokuqala.
Osekwenza iNjampela emele iKwaZulu-Natal, ibe ngaphansi kwengcindezi, wukuthi iRangers isizihola phambili kuGroup A ngamaphuzu amathathu namagoli amane, isangenelwe yigoli elilodwa.
INjampela emele izotholana phezulu neFN Rangers namuhla ngo-9 ekuseni, eMxolisi Dicky Jacobs Stadium.
Iqembu laseKZN elinephuzu elilodwa, kudingeka liwunqobe lo mdlalo ukuze iqede liphezulu kuGroup A. Lokhu kuzosho ukudlulela esigabeni esilandelayo sale midlalo yokuhlunga amaqembu amabili azogcina ekhuphukele kwiMotsepe Foundation Championship.
KuGroup B iHigh Bury yase-Eastern Cape ihlezi phezulu ngamaphuzu amane. Ishaye iMangaung United ngo 1-0 kowokuvula ngoLwesibili, yalandela ngokudlala ngokulingana ngo 0-0 neThames FC yaseNorth West, izolo.
Lokhu kusho ukuthi sekubhekwe umdlalo weThames neMangaung onamuhla ngo-3 ntambama.
IThames idinga ukuwunqoba ngamagoli angaphezulu kwamabili ukuze igudluze iHigh Bury esicongweni sikaGroup B.
Group C iKruger United yaseMpumalanga nayo isizibeke ethubeni lokwedlulela emzuliswaneni olandelayo, ibambane ngo 0-0 neDondol Stars yaseGauteng, nosekuyenza ibe namaphuzu amane. Kowokuvula ishaye i-NC Professionals engosokhaya (Northern Cape) ngo 1-0.
Emdlalweni wanamuhla ngo-12 emini phakathi kweDondol neProfessionals, kungase kucace ukuthi iDondol iyayigudluza yini iKruger esicongweni.
Mane amaqembu azodlala eyandulela owamanqamu kusasa. Owamanqamu uzoba ngeSonto, kudlala amaqembu asevele ekhuphukele kwiMotsepe Foundation.
Imidlalo yanamuhla:
Ngo-9am: FN Rangers v Njampela FC
Ngo-12pm: Dondol Stars v NC Professionals
Ngo-3pm: Thames v Mangaung United