INJAMPELA FC ibuye nephuzu elibalulekile emdlalweni wayo wokuvula wamaPlay-Off kazwelonke eSafa ABC Motsepe League ibambana ngo 2-2 neMpheni Home Defenders yaseLimpopo, emdlalweni wayo wokuvula kule midlalo, eqale ngoLwesibili, eMxolisi Dicky Jacobs e-Upington.
INjampela emele iKwaZulu-Natal kule midlalo kazwelonke yokuhlunga amaqemubu azokhushulelwa esigabeni seMotsepe Foundation Championship.
Igoli likaNkoko Tau weHome Defenders lingene ngomzuzu ka-61 esiwombeni sesibili, nelesibili elishaywe wuLucky Mwase, kwathi amabili eNjampela ewashaye ngemizuzu yokugcina eza noNhlanganiso Mdletshe.
Emdlalweni wokuqala kaGroup C, iKruger United yaseMpumalanga iguqise ngo 1-0 iNorthern Professionals engosokhaya, kuGroup B iHigh Bury yase-Eastern Cape yaguqisa iMangaung United yaseFree State ngo 1-0.
INjampela kudingeka iwunqobe umdlalo wayo wesibili ukwandisa amathuba okwedlulela emzuliswaneni olandelayo njengoba izotholana phezulu neFN Rangers yaseWestern Cape, kusasa ngo-9 ekuseni.
Ngakolunye uhlangothi, iMpheni izotholana phezulu neFN Rangers namuhla ngo-12 emini. Kweyanamuhla kuzoqala iHigh Bury neThames yaseNorth-West ngo-9 ekuseni. Ngo-3 ntambama kubhekane iDondol Stars neKruger United.
IDondol Stars yaseGauteng neyayikhona kule midlalo ngesizini edlule, ibalwa namanye amaqembu abhekiwe ukuthi enze kahle.
INjampela yaKwaNongoma ibhekene nenselelo yokuqeda ishobolo lamasizini ayisikhombisa lokwehluleka kwamaqembu aKwaZulu-Natal ukuphumelela ukuzifaka esigabeni esilandelayo. Kwagcina ngoThongathi FC ngesizini ka-2016/17 ukuzibekisela indawo esigabeni seMotsepe Championship (ngaleso sikhathi eyayisabizwa ngeNational First Division). Amaqembu amabili azongena kowamanqamu yiwona azobe esezifake kwiMotsepe Foundation.
Imiphumela yayizolo yeSafa ABC Motsepe League National Play-Off:
Kruger United 1-0 Northern Professionals; Mangaung United 0-1 High Bury; Njampela FC 2-2 Mpheni Home Defenders
Imidlalo yanamuhla: Ngo-9am: High Bury v Thames
Ngo-12pm: Mpheni Home Defenders v FN Rangers
Ngo-3pm: Kruger United v Dondol Stars