USALE ezishaya isifuba ngendlela iqembu lakhe elidlale ngayo yize liguqiswe yiMamelodi Sundowns ngo 1-0 emdlalweni weHollywoodbets Super league umqeqeshi we-University of Johannesburg, uNthabeleng Modiko.
AmaBrazilian awathole ephelele amaphuzu kulo mdlalo obuse-UJ Stadium, eSoweto, ngegoli elivalelwe nguLebohang Ramalepe ngomzuzu ka-51.
Lo mphumela uchaza ukuthi amaSandawana asecoshe amaphuzu ayisithupha kwi-UJ kule sizini kwazise ayiqumba phansi ngo 2-0 ngoMashi.
Asaqhwakele kwi-log ngamaphuzu angu-56 emidlalweni engu-21. I-Orange Army isabambelele kweyesithathu ngamaphuzu angu-43 emidlalweni elinganayo.
UModiko uthe indlela abaqophisane ngayo neSundowns ikhombisile ukuthi kungani bengelinye lamaqembu ahamba phambili kwiSuper League kule sizini.
“Ngokwami ngicabanga ukuthi umphumela awukuvezi ngokuphelele esikwenzile kulo mdlalo. Bekuwumdlalo omuhle kakhulu futhi iSundowns yenze konke okusemandleni ukusivimba ukuthi singalishayi igoli. Basebenzisa amava abo. Abadlali bami basakhula, basafunda kodwa ngiyayibongela iSundowns ngomdlalo omuhle,” ubeke kanje uModiko.
“Singaziqhenya ngendlela esidlale ngayo kodwa kusamele sibuyele emuva siyosebenza kanzima silungiselele umdlalo olandelayo. Sizogxila emdlalweni ngamunye kodwa uma singaqhubeka ngokuzimisela maningi amathuba okuthi siyinqobe imidlalo yethu masonto onke.
“Uma singaphinde sinqobe emithathu noma emine ilandelana lizophinde likhuphuke izinga lokuzethemba kubadlali. Ukuzimisela kwabo kuyabonakala uma siziqeqesha kuphinde kuvele nasemidlalweni.”
I-University of Western Cape isahleli endaweni yesibili ngamaphuzu angu-44 emidlalweni engu-18. Isalele emuva ngemidlalo ngenxa yokuthi ibibambe iqhaza emqhudelwani weCosafa wokuhlungela iCaf Women’s Champions League, egcine iwunqobile ngempelasonto edlule.
Kuphinde kwaba yimpelasonto emnyama emaqenjini aKwazulu-Natal njengoba wonke ebuye elambatha.
IDurban Ladies iguqiswe yiFirst Touch ngo 3-1 ekuhambeni, iRoyal AM yanqotshwa yiTS Galaxy ngendlela efanayo, kwathi iLindelani Ladies yashaywa yi-University of Pretoria ngo 1-0.
Kusabukeka kuzoba nzima ukuthi iLindelani Ladies ivike izembe kwazise isasendaweni ka-15 ngamaphuzu amane.
Isele ngamaphuzu angu-12 kwiDurban Ladies esendaweni ka-14, iRoyal AM isesimweni esingcono endaweni yesishiyagalombili ngamaphuzu angu-32. Wonke lawa maqembu asedlale imidlalo engu-21.
Imiphumela yemidlalo yeHollywoodbets Super League yangempelasonto:
Copperbelt FC 0-3 University of Fort Hare, First Touch 3-1 Durban Ladies, City Lads 4-1 Thunderbirds ladies, TS Galaxy Queens 3-1 Royal AM, TUT Matsatsantsa 1-1 Richmond United, University of Johannesburg 0-1 Mamelodi Sundowns, University of Pretoria 1-0 Lindelani Ladies.