Lamontville Golden Arrows (1) 2
Kaizer Chiefs (1) 1
ILAMONTVILLE Golden Arrows iphinde yawathatha ephelele amaphuzu kwiKaizer Chiefs, iyiqumba phansi ngo 2-1 emdlalweni weBetway Premiership eMoses Mabhida Stadium ngoMgqibelo ntambama.
Bekungokwesibili Abafana Bes'thende betalabha Amakhosi kule nkundla kuyona le sizini, njengoba bawaguqisa ngo 1-0 ngesikhathi bebhekene ngoJanuwari.
Amagoli eqembu likaManqoba Mgqithi ashaywe nguNduduzo Sibiya noKnox Mutizwa ngokwehlukana kweziwombe, eleChiefs lashaywa nguYusuf Maart esiwombeni sokuqala.
Amakhosi athole ithuba lokuzibeka phambili ngomzuzu ka-10 ngesikhathi unompempe elikhomba emlotheni, esola uGladwin Shitolo ngokukheqa uGlody Lilepo ebhokisini.
Ibhola lithathwe ngukaputeni, uMaart, kodwa ishodi lakhe ebelingenamfutho lashaya epalini.
Lesi senzo sakhe simqhathe nabalandeli beziMpofana abaqale ukumhhahhameza uma ephethe ibhola, benza nezimpawu zokuthi akhishwe. Nokho, ngokuhamba kwesikhathi babuye bamxolela.
Abafana Bes’thende bagadle kuqala ngomzuzu ka-25. UKnox Mutizwa untshontshe ibhola ku-Inacio Miguel ngakulayini, ngakwesokudla, wangena ebhokisini waligobela kuSibiya, olibeke enethini ezihambela yedwa.
Kudlule imizuzu emine kuphela Amakhosi alithola elokulinganisa. UGaston Sirino uliveze kwamnandi kuMaart, obeqhamuka ngakwesokunxele, kulokhu washaya umgundatshani omshiye elele unozinti we-Arrows, u-Edward Maova.
I-Arrows ikhale yemuka namaphuzu ngegoli elivalelwe uMutizwa enethini kulandela umnyakazo omuhle oqalwe nguSiyanda Mthanti ngakwesokudla.
Komunye umdlalo weBetway Premiership obuseBuffalo City Municipality Stadium, e-East London, iChippa United iguqise AmaZulu FC ngo 2-1.
Usuthu lusasendaweni yesikhombisa ngamaphuzu angu-30 emidlalweni engu-24, lulandelwe yiChiefs, enangu-29 emidlalweni engu-23.
IChippa inyukele endaweni yesishiyagalolunye ngamaphuzu angu-28 emidlalweni engu-21, kanti i-Arrows ikweka-10 ngamaphuzu angu-27 emidlalweni engu-20.