I-KING Zwelithini Stadium, eseMlaza, izosingatha imidlalo emqoka yamaqembu aKwaZulu-Natal adlala kwiBetway Premiership, AmaZulu FC neRichards Bay FC, kweyokuvula yeCarling Knockout ngempelasonto ezayo.
I-Premier Soccer League (PSL) imemezele ngokusemthethweni ngoLwesihlanu, izinkundla nezinsuku okuzodlalwa ngazo imidlalo yeCarling Knockout. Amaqembu angu-16 ePremiership azoqhuthana kulo mqhudelwano, aqhathwe maphakathi nesonto eGoli.
Imidlalo yomzuliswano we-Last 16 izodlalelwa ezinkundleni ezahlukeke kusukela ngo-Okthoba 18 kuya ku-20.
NgoLwesihlanu AmaZulu azodudulana neStellenbosch FC okuyiyona evikela indebe emdlalweni ozoba seKing Zwelithini Stadium ngo-7 ebusuku.
Kuyona le nkundla ngeSonto, lika-Okthoba 20, iRichards Bay izotholana phezulu neSekhukhune United ngo-5.30 ntambama.
Amanye amaqembu amabili aseKZN, iLamontville Golden Arrows neRoyal AM, eyawo imidlalo azoyidlalela ekuhambeni. I-AM izotholana phezulu neCape Town City ngoMgqibelo ka-Okthoba 19 e-Athlone Stadium, eKapa, ngo-3 ntambama.
Ngawo uMgqibelo, iLamontville Golden Arrows izogadulisana neMamelodi Sundowns eLucas Moripe Stadium, e-Atteridgeville, ngo-6 kusihlwa.
I-Stellies izotholana phezulu noSuthu olusanda kuqasha abaqeqeshi abasha okunguVusumuzi Vilakazi no-Arthur Zwane abazosebenza ngokubambisana.
EzikaSteve Barker, ezisazikhotha amanxeba kulandela ukuphucwa iqatha emlonyeni yiPirates kowamanqamu eMTN 8 ngeledlule, zibhekene nenselelo yokuvuka zizithathe kulo mdlalo wazo wokuqala wendebe ezayiqukula nyakenye eMoses Mabhida Stadium, eThekwini, ziguqisa i-TS Galaxy.
Eminye imidlalo ebukeka izothatha amehlo, okubalwa kuyo owe-Orlando Pirates neMagesi FC ngoMgqibelo, e-Orlando Stadium, eSoweto, ngo-3 ntambama.
Kube oweSuperSport United neKaizer Chiefs ngeSonto lika-Okthoba 20, eNew Peter Mokaba Stadium, ePolokwane, ngo-3 ntambama.
EZimnyama ziza kulo mdlalo womkhumulajezi nje zisashayela phezulu kulandela ukudla umhlanganiso kowamanqamu eMTN8 ngeledlule, eMabhida. Kubhekwe ukuthi zizokwazi yini ukuqhubeka nomgqigqo wazo uma zibhekene neMagesi engomakoti kwiPremiership.
Izinkundla nezinsuku zemidlalo ye-Last 16 yeCarling Knockout:
Ngo-Okthoba 18
AmaZulu v Stellenbosch FC (King Zwelithini Stadium, 7pm)
Ngo-Okthoba 19
Orlando Pirates v Magesi FC (Orlando Stadium, 3pm); Cape Town City v Royal AM (Athlone Stadium, 3pm); Mamelodi Sundowns v Golden Arrows (Lucas Moripe Stadium, 6pm); Polokwane City v Marumo Gallants (Old Peter Mokaba Stadium, 8pm)
Ngo-Okthoba 20
TS Galaxy v Chippa United (Mbombela Stadium, 3pm); Supersport United v Kaizer Chiefs (New Peter Mokaba Stadium, 3pm); Richards Bay FC v Sekhukhune United (King Zwelithini Stadium, 5.30pm)