SIBUSISO MDLALOSE
SIBOPHELE izibabuli zabadlali isikwati esisazophundlwa seqembu lesizwe lika-Under 20, Amajita, esimenyezelwe ngumqeqeshi uRaymond Mdaka.
Nakuba lesi sikwati sabadlali abangu-30 sisazophungulwa sibe ngabadlali abangu-23 kodwa okugqamile ngaso wukufakwa kwabadlali asebezakhele igama kwiBetway Premiership nabathathe amehlo abaningi kwiDStv Diski Challenge (DDC). Kulaba badlali kukhona uMfundo Vilakazi noNaledi Hlongwane beKaizer Chiefs, uMbekezeli Mbokazi we-Orlando Pirates, uSiviwe Magidigidi weSupersport United, Kutlwano Lethlaku weMamelodi Sundowns noLangelihle Phili weStellenbosch FC.
Laba badlali sebeqalile ukukhombisa izimpawu zokuba yimithente ehlaba isamila emaqenjini abo, ikakhulukazi uMbokazi, Vilakazi, Magidigidi noLethlaku.
UVilakazi usedlale imidlalo engu-18, washaya amagoli amabili kule sizini eqenjini elikhulu leChiefs, uMbokazi usedlale imidlalo emithathu washaya igoli elilodwa. UMagidigidi osephenduke esinye sezithenjwa zikaGavin Hunt kuMatsatsantsa, usedlale imidlalo engu-13,kanti uLethlaku usedlale eyisithupha, washaya amagoli amabili. KwiStellies uPhili, obuye ayibambe nakwiDiski, usedlale engu-16 esikimini sePremiership.
UHlongwane ozakhele igama eshaya amagoli emdlalweni weCarling Black Label Cup, wenza ezibukwayo eqenjini leChiefs leDiski.
Amajita azomela iNingizimu Afrika kwi-Africa Cup of Nations (Afcon) ka-Under 20 ezobanjelwa e-Ivory Coast, ngo-Ephreli 26 kuya kuMeyi 18.
Amajita azibekisele indawo kwi-Afcon ngokunqoba indebe yeCosafa Under 20, ngo-Okthoba nyakenye.
Kulo mqhudelwano obuseMozambique, Amajita akhombise izinga eliphezulu ngokuyinqoba yonke imidlalo esigabeni nakwesomkhumulajezi, kwaze kwaba ngowamanqamu lapho eguqise khona iZambia ngo 2-0 eyayingompetha abavikela isicoco.
I-Afcon Under 20 iyisango lokudlulela kwiNdebe yoMhlaba ka-Under 20 ezobanjelwa eChile, eSouth America, ngoSepthemba kuya ku-Okthoba.
Amaqembu amane azofinyelela kweyandulela owamanqamu kwi-Afcon e-Ivory Coast, yiwona azothola ingqayizivele yethuba lokumela i-Afrika kwiNdebe yoMhlaba, eChile.
Isikwati saMajita okuzohlungwa kusona ese-Afcon:
Takalani Mazhamba (Chiefs); Kgoleng Ratsani (Sekhukhune); Musa Masemola (Via Sport); Mbekezeli Mbokazi (Pirates); Tylon Smith (Stellenbosch); Gopolang Taunyane (Chiefs); Asekho Tiwane (Sundowns); Thato Sibiya (Sundowns); Siviwe Nkwali (CT Spurs); Neo Rapoo (SuperSport); Gomolemo Kekana (Sundowns); Patrick Autata (CT City); Lazola Maku (SuperSport); Mfundo Vilakazi (Chiefs); Ofentse Kgosana (Chiefs); Langelihle Phili (Stellenbosch); Shakiel April (CT City); Kutlwano Lethlaku (Sundowns); Gabriel Amato (CT City); Bennet Mokoena (Sundowns); Faiz Abrahams (Stellenbosch); Luke Baartman (CT Spurs); Jody Ah Shene (CT City); Thabang Mahlangu (SuperSport); Siviwe Magidigidi (Supersport); Naledi Hlongwane (Chiefs); Kgomotso Modiba (Stars of Africa); Thato Mpati (Magesi FC); Kabelo Nkgwesa (Chiefs)