ZIZODLANA imilala phakathi kwezinkalimeva zabagijimi emjahweni wabesifazane iDurban Spar Women’s 10km Race okhuza ibuya ozogijinyelwa eHollywoodbets Kings Park Stadium, eThekwini, ngeSonto likaJuni 23.
Kulo mjaho ohlanganisa nebanga lika-5km ozosukela ngaphakathi eHollywoodbets Kings Park, usongwe ngaphandle kwale nkundla, kubhekwe ukuba zidlane imilala phakathi kwabagijimi abathwelwe ngeqoma nalabo okubhekwe ukuba bashubise umbango womjaho ngokubadlisela ogageni. U-10km uzoqala ngo-8 ekuseni, u-5km uqale ngo-9 ekuseni.
UTadu Nare wase-Ethiopia ogijimela iNedbank Running Club usewudle umhlanganiso amahlandla amabili iminyaka ilandelana owebanga lika-10km ngo-2022 nango-2023. Kubhekwe ngabomvu ukuthi uzokwazi yini ukwenza okufanayo nakulo nyaka.
Ngaphandle kukaNare, abanye abagijimi ababhekiwe uMakhosi Mhlongo, uTayla Kavanagh noRutendo Nyahora beHollywood Athletics Club.
UMhlongo uke wenza kahle kwiMandela Marathon, kanti uKavanagh noNyahora waseZimbabwe nabo ngabanye beHollywood abangase badlisele ogageni uNare osekhonye iminyaka ilandelana kulo mjaho.
Ngaphandle kwalaba asebebalwe ngenhla, ubhekiwe noSelam Gebre weNedbank ophume isibili nyakenye, uBlandina Makatisi ogijimela iMaxed Elite ophume isine nyakenye, uKesa Molotsane weMurray & Roberts ophume isihlanu nyakenye, noCacisile Sosibo weBoxer Running Club ophume isithupha nyakenye.
Umgijimi ozoshaya intambo uzohlomula ngo-R33 000, isibili kube wu-R25 000, isithathu kube wu-R20 000. Umgijimi ongowokudabuka eNingizimu Afrika ozoshaya kuqala intambo uzophinde engezelwe ngo-R10 000.
Imingenelo yalo mjaho ku-online izovalwa ngeSonto phakathi kwamabili. Ukungenela umjaho ka-10km kumgijimi onelayisensi yeKZN Athletics kuzoba u-R180, kube wu-R230 konelayisensi yesikhashana, bese kuba wu-R180 ukungenela umjaho ka-5km.
Kanti labo bagijimi abazongenela umjaho ngalo usuku lomjaho bona bazokhokha uR200 ku-10km kwabanamalayisensi, kube uR250 kwabangenawo amalayisensi, bese kuba uR200 ukungenela u-5km.
Imininingwane yokungenela umjaho itholakakala ku: www.sparwomensrace.co.za