UMCULI wokholo uKhulekani Chili, uphuthunyiswe esibhedlela iCharlotte Maxeke, elimele kanzima emuva kokwehlelwa yingozi yemoto ngeSonto ngabo-7 ebusuku, eSandton, eGoli.
UKhulekani uthe wehlelwe yilo mshophi ephuma emhlanganweni lapho bekulalelwa khona umucu wakhe omusha futhi bekudingidwa ngokuthi bazowukhangisa kanjani.
"Ngithe sengiseGrayston, ngathi uma ngingena emarobhothini abengivumela, ngashayiswa ngenye imoto. Ngihluleke ukulawula imoto yami iFord Fiesta, ngaye ngayoshayisa ibhokisi likagesi maqede imoto yaphaphalazela ogqegqemeni lomgwaqo. Ngihlale amahora amaningi ngizama ukuphuma ngoba bengivalelekile emotweni."
Uqhube wathi ulimale kabi kangangoba uze waphuka izimbambo nethambo lasegxalabeni.
UKhulekani uthe ukulimala kuphazamise izinhlelo zokukhangisa ngengoma yakhe entsha ethi Bhasobh' Umngani, nemicimbi abezonandisa kuyona.
Eminyakeni edlule umculi waduma kakhulu kodwa ukwaziwa kwakhe kwaphazanyiswa ukudakwa wutshwala. Uze wavela nasohlelweni lweMoja Love olisiza abantu asebeyimilutha yotshwala Uyaphuza, nakweloMzansi Magic iBlew It.
Uphuzo oludakayo lwamenza wagcina esebandakanyeka ezingozini zomgwaqo futhi esewukudla kwejele njengoba manje esezelwe kabusha.
Waqala ukuzakhela udumo nge-albhamu ethi Ingane Yomfana ngo-2007. Ngo-2022 wakhipha esihloko sithi Ungumhlobo kodwa izingoma adume ngazo ngezithi Ngenzeni, Makhelwane, Ndiwanga Morena nethi Xola Sitha Sami.