Limanzi te iTheku ngale mpelasonto

NAMHLANJE sibondwe sashiywa nephini eThekwini njengoba ubumnandi buzobe bubuzwa kuleli dolobha. Yize umcimbi obhekwe ngamehlo abomvu kuyiGcwalisa Spring Picnic: All White, eseKings Park Stadium, kodwa kukhona ne-Africa Is Not A Jungle eBotanic Gardens.

Yomibili le micimbi iqala ngo-12 emini. IGcwalisa Spring Picnic: All White igabe ngoKhuzani, Vusi Nova, Nkosazana Daughter, Somizi, DJ Tira, Eemoh, Felix Hlophe, Betusile, AmaLegend (okunguSomnandi, Igeza LakwaMgube noShwi), uMafikizolo, Imithente, Izingane Zoma, Thandeka Radebe, Dkt Buselaphi nabanye.

Kwi-Africa Is Not A Jungle kuboshelwe uBlack Coffee, 2wobunnies, Asvnte, Babalwa M, Breetz, Ciza, De Rocka, Dlala Thukzin, Jordan Arts, Man Q, Major League DJz, Oscar Mbo, Stanky Deejay, Tirhani nabanye. NaseMax's Lifestyle eMlazi zizobe ziphenduka njengoba kuneHeineken SA Luxe Experience. Kulo mcimbi kuzobe kunandisa uBabalwa M, Fisto, Siyanda 031,Kai Kai, Famsoul, Leemza RsbudhaDJ noSnake.

Omunye wabagqugquzeli beGcwalisa Spring Picnic: All White,  uMthokozisi Zuma, uthe konke sekumi ngomumo.

Ugquguzele abazohambela lo mcimbi ukuba basheshe bafike bangasindwa yizinyawo ngenxa yokuthi iciko lokuqala lizobhula amazolo ngo-12 emini. Mayelana nesiminyaminya esilindeleke eduze kwenkundla okuzobanjelwa kuyo iGcwalisa njengoba kunomdlalo we-Orlando Pirates neRichards Bay eMoses Mabhida Stadium, uZuma uthe  ngeke baphazamiseke abantu abeza kwiGcwalisa.

"Ezinkundleni zokuxhumana sizomemezela ukuthi basebenzise miphi imigwaqo ukuze bafinyelele kalula enkundleni. Besinomhlangano nezikhulu zamaphoyisa kaMasipala weTheku nawomgwaqo kwavunyelwana ngokuthi amaphoyisa azobe enkanise kuyona yonke imigwaqo esondelene nalezi zinkundla zombili azoqinisekisa ukuthi asikho isiminyaminya," kusho uZuma.

Uveze ukuthi amathikithi abangakawatholi asatholakala futhi bangalinge bakhathazeke ngesimo sezulu njengoba kuzobe kushisa.

Amathikithi asatholakala eComputicket ngo-R150, R250 no-R1 500 i-VIP.