Usinde emlonyeni wengwenywa owasulelwa ngelokudlwengula unkosikazi

Owesilisa owalahlwa yicala lokudlwengula owayengunkosikazi wakhe uphume ejele ngemuva kokuthi iNkantolo eNkulu yaseNorth West ithole ukuthi ubesolwa ngamanga.

Umlisa ohlonzwe njengo-PS walahlwa yicala lokuthumba, ukusabisa, nokudlwengula yiNkantolo yesiFunda ePotchefstroom wabe esegwetshwa iminyaka eyishumi. Ngesikhathi kwenzeka lesi sigameko, uPS nowayengunkosikazi wakhe bebeshadile kodwa behlala ngokuhlukana, behlala emakubo. Waya kubo kankosikazi edilini lesintu ngemva kokuba emmemile.

Ngemuva komcimbi, unkosikazi ucele u-PS ukuthi ahambise izihlobo emakhaya esebenzisa imoto yakhe. Wamphelezela lapho ehambisa isihlobo sokugcina.

Ngesikhathi bebodwa emotweni, u-PS wazama ukuxoxa ngokulungisa umshado wabo. Nokho lo wesifazane wayengazimisele ngokubuyelana futhi waveza ukuthi useqhubeke nomunye umuntu.

Ngokwamaphepha asenkantolo kuvela ukuthi i-PS waphendula kabi kule nkulumo, okwaholela ezenzweni ezahlukene ezihlanganisa ukusatshiswa, ukuthumba, nokudlwengula.

Kuthe uma ededelwa ngakusasa unkosikazi wagoduka wayobikela unina ngesigameko. Baya esiteshini samaphoyisa ukuyobika lolu daba; nokho, ukuhlolwa kwezokwelapha akuzange kuveze ukulimala okubonakalayo noma okungavamile kwezifo zabesifazane. 

Enkantolo, imantshi yathola isisulu singufakazi othembekile ongenaso isizathu sokusola umyeni waso ngamanga. Isinqumo semantshi siphume phezu kobufakazi bukadadewabo kaPS othole umyalezo ocingweni lukankosikazi lapho eveze khona ukuthi unenhloso yokuvulela owayengumyeni wakhe icala elingelona iqiniso. Imantshi yabushaya indiva ubufakazi obuthi udade uhlobene nendoda, yaveza ukuthi ayimthandi unkosikazi. U-PS usidlulisile lesi sigwebo, ethi inkantolo yehlulekile ukusebenzisa kahle isinqumo sokuxwayisa ebufakazini bofakazi oyedwa, nokuthi kutholwe ukwethembeka kunkosikazi. IJaji uRonald Hendricks usingathe isicelo sokudlulisa icala futhi laphawula ukungahambisani phakathi kwesisulu nobufakazi bukanina. Akazange akhulume ngegazi esithweni sakhe sangaphansi kunina, nokho unina wafakaza ukuthi ulibonile. Ukuhlolwa kodokotela akuzange kuveze igazi esithweni sangaphansi. Lobu bufakazi bushaywe indiva imantshi eyaveza ukuthi kungenzeka ukuthi umama wenze iphutha. "Akumenzi ufakazi ongathembekile. Kungenzeka ukuthi kwaba yiphutha kuyena ngemuva kokuzwa ngendodakazi yakhe ukuthi idlwenguliwe...Uhlabe umxhwele iNkantolo njengomuntu okufanele kukholwelwe ubufakazi bakhe futhi iNkantolo iyakukholelwa lokho," kusho imantshi ngaleso sikhathi.