Kuzolandela uMasemola kwiKhomishini kaMadlanga

KUBHEKWE uKhomishana wamaPhoyisa kuzwelonke, uLieutenant General Fannie Masemola, ukuba ahlukanise inhloko nesixhanti ngodaba lomyalelo wokuba kuhlakazwe ithimba eliphenya amacala ezepolitiki KwaZulu-Natal, uma esethula ubufakazi kwikhomishini ephenya izinsolo ezenziwa uKhomishana wamaPhoyisa KwaZulu-Natal, uLieutenant General Nhlanhla Mkhwanazi.

UMasemola uzoqala ukwethula ubufakazi phambi kwekhomishini eholwa yiJaji uMbuyiseli Madlanga namhlanje.

Lesi simemezelo senziwe okhulumela ikhomishini, uMnuz Jeremy Michaels, izolo.

UMasemola ungufakazi wesibili kwikhomishini. Ufakazi wokuqala, uMkhwanazi, uphothule ubufakazi bakhe ngoLwesihlanu.

Kulezi zinsuku ezintathu eseshashalazini kwikhomishini, uMkhwanazi wenze izinsolo eziningi ezishaqisayo.

Uhlabe wahlikiza isinqumo sikaNgqongqoshe wezamaPhoyisa omisiwe, uMnuz Senzo Mchunu, sokukhipha umyalelo wokuba kuhlakazwe ithimba lamaphoyisa eliphenya ukubulawa kosopolitiki KwaZulu-Natal.

UMkhwanazi uthe uMchunu akanawo amandla okuhlakaza ithimba, wathi uMasemola ongaba namandla okuhlakaza ithimba.

Umyalelo wokuba kuhlakazwe ithimba wakhishwa uMasemola engekho, esathathe ikhefu.

Namhlanje kubhekwe ukuthi uMasemola abeke uhlangothi lwakhe ngalolu daba.

UMkhwanazi uphinde wenza ezinye izinsolo ezishaqisayo ngoMchunu amsole ngokusondelana nezigebengu eziphazamisa ukusebenza kwamaphoyisa.

Uthe uMchunu unobudlelwano nosomabhizinisi oboshelwe uxhaxha lwamacala, uMnuz Vusumuzi "Cat" Matlala.