IKhabhinethi nekhwelo kwabafuna ukufakaza kwekaMadlanga

IKHABHINETHI isinxuse abanolwazi abangafuna ukulwethula kwikhomishini ephenya izinsolo ezenziwa uKhomishana wamaPhoyisa KwaZulu-Natal, uLieutenant General Nhlanhla Mkhwanazi, ukuthi baxhumane nale khomishini.

Le khomishini eyaziwa ngekaMadlanga, iphenya izinsolo zokugxambukela kosopolitiki, inkohlakalo nobugebengu obenzeka emkhakheni wokulwa nobugebengu kuleli.

UNgqongqoshe eHhovisi likaMengameli, uNksz Khumbudzo Ntshavheni, uthe iKhabhinethi ikwamukele ukuqala kokulalelwa kobufakazi kule khomishini.

UMkhwanazi uyena oqale ukuthula ubufakazi kwikhomishini kusuka ngoLwesithathu nayizolo.

"IKhabhinethi inxusa noma ngubani ofuna ukuthula ulwazi ukuthi axhumane nekhomishini ngokushesha. Angakwenza lokhu ngokuyibhalela ku:[email protected] noma ashayele ku: 0800 111 369."

UMkhwanazi waveza izinsolo zokuthi kunezigebengu ezisondelene nosopolitiki eziphazamisa ukusebenza kwamaphoyisa kuleli.

UNksz Ntshavheni ubuye waveza ukuthi iKhabhinethi yamukele ukukhula komnotho ngo-0.8% ekoteni yesibili ka-2025.

Uveze nokuthi uMengameli Cyril Ramaphosa uzohola ithimba elibheke eNew York, elizothamela umhlangano ka-80, we-United Nations.

"Lo mhlangano uqala ngoSepthemba 23 kuya kuSepthemba 29. Kuyobhungwa ngezinto ezithinta ukuthula nezithinta amalungelo. Kunongqongqoshe abavele sebeseMelika, abayoqhubeka nezingxoxo ngezithinta ukuqinisa amaxhama okuhwebelana," usho kanje.

Uthe uMnyango wezeMidlalo usebenzisana nababeyiziboshwa ejele iRobben Island, bazoba nomcimbi wokuhlanganisa iziboshwa ezibalelwa ku-1 700 ezaziboshwe kuleli jele. 

"Umcimbi ungoSepthemba 27. Kuzobe kuhlangana abalwa belwela ukuthi izwe likhululeke. Kuzobe kukhona nabavela kwamanye amazwe okubalwa iNamibia, Lesotho neBotswana."