Ubizelwe phambi kwekomiti owe-IFP oboshelwe elokuzama ukubulala
Siphiwe Cele
Image: File
UZOVELA phambi kwekomiti le-IFP elilusa ukusebenza kwabajutshwe ezikhundleni umholi we-IFP oboshelwe icala lokuzama ukubulala.
UMnuz Siphiwe Cele oyiKhansela kuMasipala wesiFunda iLembe, uzovela phambi kwekomiti elelusa abajutshwe ezikhundleni, namhlanje.
UCele, ophinde abe unobhala we-IFP esiFundeni iLembe, ubizelwe phambi kwekomiti emva kokuba eboshelwe icala lokuzama ukubulala.
Okhulumela i-IFP, uMnuz Mkhuleko Hlengwa, uthe iqembu libikeliwe ngokuboshwa kukaCele.
"Ubuholi be-IFP esiFundeni iLembe busazisile ngokuboshwa nezinkinga zomthetho ezibhekene noCele. Udaba lwakhe lusezithebeni zekomiti elelusa abajutshwe ezikhundleni. Ikomiti elelusa abajutshwe ezikhundleni lizokwethulela isigungu esiphezulu umbiko ngalolu daba emhlanganweni wesigungu esiphezulu olandelayo, nokuyilapho ke isigungu esiphezulu esiyokube sesithatha khona isinqumo."
UCele udedelwe ngebheyili ka-R1 000 eNkantolo yeMantshi KwaDukuza ngeledlule emva kokuhlala impelasonto yonke ezikhindini kanti waboshelwa izinsolo zokuzama ukubulala emva kokuzama ukudubula uMnuz Vukani Mthembu, emva kwengxabano.
UHlengwa uthe bayalusukumela udaba lukaCele.
"Izinsolo abhekene nazo zibucayi kakhulu, ingakho udaba lwakhe silubeke phambili."