Umuga umlilo uhlasela uphindelela kowaseNdlunkulu
UMPHATHISWA wokuBusa ngokuBambisana kanye neziNdaba zoMdabu KwaZulu-Natal, uMfu Thulasizwe Buthelezi, exhawulana noMntwana uPhilemon kaTshelendoda kaDinuzulu. Lapha kungesikhathi kushe umuzi kwaFihlinqindi, ngasekuqaleni konyaka
Image: KZN Cogta
IMINIKELO eyatholwa wuMntwana uPhilemon kaTshelendoda kaDinuzulu ngesikhathi eshelwe wumuzi ngasekuqaleni konyaka
Image: KZN Cogta
KUBATSHAZWA umuga umlilo uhlasela uphindelela emzini wengwevu yaseNdlunkulu, uMntwana uPhilemon kaTshelendoda kaDinuzulu.
UMntwana uPhilemon uselala obenyoni njengoba ehlaliswe lubhojozi umlilo oqale ukuhlasela kwaFihlinqindi, oSuthu, ngasekuqaleni konyaka.
Umlilo ongaziwa oxake kwaFihlinqindi ufike ungqongqise impahla yasendlini.
Umlilo ohlasele kwaFihlinqindi kuthiwa unenkani yesele njengoba kuthiwa kuba nzima ukuwubhula uma usuqalile.
Kuleli sonto umlilo uhlasele kathathu kwaFihlinqindi.
Umlilo ongaziwa uhlasele kwaze kwakathathu kulelisonto kwaFihlinqindi, oSuthu.
UMntwana uPhilemon uthe kuleli sonto umlilo uqale ukuhlasela ngoMsombuluko. Uthe umlilo uphinde waqubuka ngoLwesithathu.
"Akulalwanga izolo (ngoLwesithathu) kade kusha. Kushe yonke into ebisendlini kwaze kwasha ngisho nemibhede nezingubo zokulala. Bazamile ukukhipha ezinye izimpahla. Mina ngize ngabashiya ngayolala kwenye indlu."
UMntwana uPhilemon uthe umlilo uphinde waqubuka nangoLwesine ngesikhathi bebesababaza umonakalo odalwe umlilo obusha ngoLwesithathu.
Umlilo oqubuke ngoLwesine kuthiwa uze washisa ngisho impahla yasendlini ebibekwe emnyango, ibalekiselwa umlilo wangoLwesithathu.
"Namanje nje kade sekusha futhi. Kushe ngisho kwambhede ebengilele kuwo. Angazi ukuthi sengizokwenza njani."
UMntwana uPhilemon uthe inkinga yokuhlasela komlilo iqale ngoFebhuwari.
UMntwana uPhilemon uthe sekukaningi kusha kulo nyaka.
"Noma ngingasakhumbuli ukuthi sekukangaki kodwa khona sekukaningi impela kusha. Kuke kwathi ukuma kancane kodwa ke sekuqale phansi manje. Sesihlezi sigadile ngoba asazi ukuthi kuzophinde kushe nini."
UMntwana uPhilemon uthe abazi ukuthi umlilo udalwa yini.
"Sithi sihleli nje kuvele kubonakale umlilo sekusha. Sithi sisazama ukubhula lowo uvele uqale kwenye indlu. Nangenyanga edlule nje kukhona umlilo ohlaselile. Kuvele kwasha kwenye indlu waze wangenelela kwezinye izindlu. Kuyaye kushe kakhulu impahla, izindlu azishi kakhulu. Akungaze kungasha kuze kushe uphahla lwendlu. Uma usuqubukile umlilo kuyaye kube nzima ukuwubhula."
UMntwana uPhilemon uthe abakhulumayo basola isandla semfene ngalo mlilo.
"Abantu bathi le nto yenziwa abantu uma besuke befuna ukukuchitha endaweni, befuna uhambe. Angazi ukuthi ubani ke ongafuna ukuchitha mina njengoba sengizigugele nje."
UMntwana uPhilemon uthe akakucabangi ukushiya endaweni njengoba kulele kuyo obabamkhulu bakhe.
"Ngisazoqhubeka nokuhlala lapha endaweni yize noma umuntu ehleli kanzima. Ayikho into engizoyenza ngoba lapha kusezweni lawobabamkhulu."