UNyazi lugadle kwiMisebeyelanga nakoFakazi BakaJehova luvala umhlangano

UMHOLI webandla lakwaShembe, ohlangothini lwaseBuhleni, Inkosi uMduduzi Unyazilwezulu Shembe, ugadle isinyenyela eNkosini yaseThembezinhle engasekho, uVela Imisebeyelanga Shembe nakoFakazi bakaJehova ngesikhathi evala umhlangano kaJulayi ngempelasonto.

Unyazi luthe ngabe kwaphela ngenkonzo yobuNazaretha ukube amaQadi ayengekho, ikakhulukazi Inkosi uMzonjani neNkosi uMqoqi Ngcobo. Belucacisa ngokunikeza Inkosi yamaQadi inkonzo yasekuseni. Luthe lokhu kwaqalwa yinkosi esiyakhothama nengumkhulu walo, u-Amos Kula Inyangayezulu Shembe eminyakeni eyedlule.

"Umkhulu Inyangayezulu kwakuthi uma kuyiSabatha lokuvalwa komhlangamo kaJulayi, inkonzo yasekuseni inikezwe iNkosi yamaQadi bese eyasemini iphathwa wuyena umkhulu." UNyazi luthe luzama ukubuyisela le nkonzo yokuvala umhlangano kaJulayi kokwakwenziwa yiNyangayezulu. 

"Ukube ayengekho amaQadi la, ngabe ubuNazaretha baphela. Ngesikhathi inkosi ezala le ekhona yamaQadi (uMzonjani), ithatha isifungo sobuNazaretha ngesikhathi sikamkhulu, Ilanga (Inkosi Johannes Galile Shembe), kwathi uma umkhulu eseyibhabhadisa wathi namhlanje ngiyitholile inkosana yobuNazaretha."

UNyazi luncome kakhulu amagalelo eNkosi uMqoqi ekusimamiseni leli bandla laseBuhleni.  "Nanamhlanje leli Qadi elikhona libumele lobu buNazaretha, sihamba nalo izinkantolo, limile lithi 'uNyazi iNkosi, angiyazi enye inkosi. Nangesikhathi besifakele amaphepha ngaphansi, sebezenze zonke izinto, sebethe bazomemezela leliya gama ababethi likhona (Imisebeyelanga). Angazi iQadi layibamba kanjani le nto ukuthi nakhu konakala. Labe selimemeza elami igama kuqala. Nalo elesibili lamenyezelwa, kodwa-ke ukumenyezelwa kwalo akuthathanga sikhathi ngoba elami lisekhona namanje. Into enobuNkulunkulu ayifi kodwa-ke manje uma inobuNkulunkulu obushodayo iyafa, iphele."

UNyazi lukhuluma kanje kuyaziwa ukuthi ngenkonzo yokutshalwa kukayise, Inkosi uVimbeni Uthingolwenkosazane Shembe ngoMashi 2011, Inkosi uMqoqi yamemzela kuqala uNyazi kwathi ummeli woThingo uMnuz Zwelabantu Buthelezi wamemezela umfowabo woThingo, Imisebeyelanga. Kwathi uma isixazululo singaphumi ngaphakathi ebandleni, kwabe sekuyiswana eNkantolo eNkulu yaseThekwini lapho Imisebeyelanga yaphumelela khona ngo-Okthoba 2016.

Abameli boNyazi babe udaba sebeludlulisela eNkantolo eNkulu yaseMgungundlovu, ngo-Okthoba 23, 2017 kodwa kwaphinda kwanqoba Imisebeyelanga. NgoNovemba 24, 2017, Imisebeyelanga yakhothama emuva kokudunguzela isikhashana, kwabe sekuqokwa Inkosi uPhinda "Ukukhanyakwelanga" Shembe ukuba ihole uhlangothi lwaseThembezinhle ngoDisemba 23, 2017.

AboNyazi baphinde badlulela eNkantolo ePhakeme yokuDlulisa amaCala nakhona bafike bachithwa ngoDisemba 2, 2019. Babe sebedlulela eNkantolo yoMthethosisekelo nakhona bakhala ngaphansi okwentshebe yaKwaMashu. Kwathi ngoDisemba 4, kwayalelwa uNyazi ukuba luphume luphele eBuhleni kodwa lwanqaba, kunalokho isikhonzi senkantolo saphuma sesihlehla nyova kusha isimbambamba.

Sekungumlando ukuthi ngo-Okthoba nyakenye kugcine kunqobe uNyazi njengoba abaseThembezinhle bachithwa yinkantolo esicelweni sabo sokuba luyekiswe ukukhonzisa amaNazaretha, ukuzibiza ngomholi wakwaShembe, luphume luphele eBuhleni futhi lungathathi ngisho noma yini ethathekayo eBuhleni uma seluhamba nabalandeli balo. Inkantolo yavele yathi inkomo ingazala umuntu ngoba umuzi waseBuhleni uyikhaya loNyazi.

Kule nkonzo okubonakale kudansa ngisho ilanga futhi lishintsha imibala, uNyazi luthe amaNazaretha akahlukane nokuthenga amabhukwana awanikezwa ngoFakazi BakaJehova. "Ningavumi wemaNazaretha ukuhamba nivinjwa yilaba bantu abama ezimpambanweni zemigwaqo belokhu benidayisela lokhu okuthiwa woPhaphama. Angiyena uPhaphama mina, nginguShembe. Le nto yifa lenu lokuphila, eningalibangi namuntu. Manje ngoba niyabazi lobu buNazaretha, nizohluthuka uma umuntu eniphikisa, musani ukuhlanganyela nabo. Mina ngiwu-2, ngikhona angikho. UShembe uyinto esuke ikhona ibe ingekho. Uma uyimemeza iyasabela," kuphetha uNyazi.