Babili abasale enkundleni bezwana amandla namaphoyisa ngenhlamvu
BABILI abasolwa abasale enkundleni kudutshulwana namaphoyisa eLenasia, ngoLwesine ekuseni.
Image: SAPS
KUFE abasolwa ababili kwabayishumi abavinjwe amaphoyisa eLenasia, eningizimu yedolobha iGoli, ngoLwesine ekuseni.
Uphenyo beluholwa uphiko lwe-Crime Intelligence ngokubambisana nezinye izihlaka zezomthetho okukhona kuzo i-SAPS Tactical Response Unit noMnyango wamaPhoyisa kaMasipala waseGoli (JMPD), bathole imininingwane ngetulo lokuqhunyiswa kwe-ATM yiqembu lamalungu ayi-10 ezigebengu eziyingozi.
Abasolwa bebefunelwa amacala okuqhunyiswa kwama-ATM namanye amacala abucayi eGauteng nakwezinye izifundazwe ezingomakhelwane.
IPhini likaKhomishana wamaPhoyisa, uLieutenant General Shadrack Sibiya, uncome bonke ababambe iqhaza ngobuqhawe babo bebhuntshisa itulo lemigulukudu lokuqhumisa i-ATM eProtea.
“Ukubambisana phakathi kwabomthetho nezinhlaka ezifanele ezifana nezokuphepha ezizimele kubamba elikhulu iqhaza ekunqandeni nasekulweni nobugebengu obunodlame ezweni,” kusho uLt General Sibiya.