Enye ingwadla umasipala uhlulwa ukuholela abasebenzi

USIZI luzwa olunye kuMasipala waseMpendle osekuyinto eyaziwayo ukuthi ubhekene nenkinga yemali.

Kuvela ukuthi abasebenzi balo masipala sebephindwe yinduku efanayo neyangoKhisimusi njengoba bengakakhokhelwa imiholo yabo kaJanuwari.

Esitatimendeni esikhishwe wumasipala, uveza ukuthi izobambezeleka imiholo yabasebenzi kule nyanga.

Lapha umasipala ubalula ukuthi lokhu kungenxa yezizathu ezihlukene okuyizona eziwumnyombo wale ngwadla.

Uveza ukuthi ukweletwa yiminyango ehlukene kahulumeni kanye nomasipala wesifunda uMgungundlovu.

Uthe isiyonke imali abakweletwa yona ilinganiselwa ku-R20 million. 

Uveza ukuthi uxoxisana noMnyango weMisebenzi yoMphakathi neNgqalasizinda kanye nomasipala wesifunda uMgungundlovu ukuthola ukuthi bangakhokhelwa kanjani imali abakweletwa yona.

Uveze nokuthi baxhumana noMphathiswa wokuBusa ngokuBambisana neziNdaba zoMdabu KwaZulu-Natal, uMfu Thulasizwe Buthelezi ukubona ukuthi yini engenziwa. Kuvele nokuthi kunezingxoxo eziqhubekayo noMnyango kaMgcinimafa kazwelonke ngalolu daba.

Siqhuba isitatimende siveze ukuthi umasipala uzokwenza konke okusemandleni ukuqinisekisa ukuthi amaholo abasebenzi bayawathola ngoLwesihlanu.

Abasebenzi nezinhlangano ezibamele kuthiwa bazisiwe ngakho konke okuqhubekayo mayelana namaholo.

Abasebenzi bakulo masipala kuzokhumbuleka ukuthi babe noKhisimusi omnyama ngenxa yokungaholi.

Ikhansela le-IFP eMpendle, uMnuz Sadewu Ngubane, lakhala ngokuthi indala inkinga yemali kulo masipala.

Wadalula ukuthi umasipala uphila ngokuboleka imali ukuze uholele abasebenzi.

Waveza ukuthi umasipala usugqigqe wonke amabhange ufaka izicelo zokubolekwa imali kodwa kwanhlanga zimuka nomoya.

"Inkinga iqale ngesikhathi umasipala ungasakwazi ukuholela abasebenzi ngaphandle kokuboleka," kusho uNgubane.