Kulindwe izwi loNyazi ngokuvalwa komhlangano
KULINDWE izwi loNyazi ukuthi liqede umhlangano
Image: DOCTOR NGCOBO/INDEPENDENT MEDIA
KUXWAYISWA amaNazaretha aseBuhleni, ngaphansi kweNkosi uMduduzi “Unyazilwezulu” Shembe ukuthi angajahi ukuvalwa komhlangano kaJanuwari kepha alinde izwi lomholi webandla.
Lesi sexwayiso sikhishwe ngumkhulumeli webandla uMnuz Thokozani Mncwabe, othe alikaphumi izwi lokuthi umhlangano uyavalwa ngale mpelasonto.
“Sonke silinde izwi lomholi naye olinde izwi elizomtshela ukuthi umhlangano uvalwa nini. Ngakho kululekwa amaNazaretha ukuba angazicabangeli ngoba kungenzeka agcine esehlubuka nxa kunjalo. Abantu abangazicabangeli ukuthi umhlangano uyavalwa bese behlela ukwenza noma ukuthinta izinto eziziliwe njengoba kusemhlanganweni ngoba lokho kuzobahlubula.”
Uqhube ngokuthi kwake kwenzeka eminyakeni eyedlule umhlangano wavalwa sekuthwase inyanga entsha.
Uthe nakulokhu njengoba amaNazaretha ebuye eNtabeni eNgcwele iKhenana, eNdwedwe, ngoMsombuluko abuyela eBuhleni, eNanda, azitshela ukuthi umhlangano uyavalwa kanti kumele alinde izwi.
“Akwaziwa, sizokuzwa ngenkosi seyisho. Naphambilini ngesikhathi seNkosi Uthingo kwake kwenzeka, abantu bazithola sebehlubuka ngoba base bezitshele okwabo,” kugcizelela uMncwabe
Leli bandla elilandelwa yizinkumbi lalenyukele entabeni eNgcwele iKhenana ngoJanuwari 4.
.