BangangoZulu eya eMakheni abafuna ukuba amaphoyisa omgwaqo
Kufike inqwaba yabantu abazofaka izicelo zokuba ngamaphoyisa omgwaqo eMgungundlovu
Image: Sithunyelwe
KUZOSHIYANA ukwenza entsheni engaphezu kuka-34 000 ibangisana ngemisebenzi ebalelwa ku-200 kwaRoad Traffic Inspectorate (RTI) KwaZulu-Natal.
NgokoMnyango wezokuThutha esifundazweni, ingaphezu kuka-34 000 intsha efake izicelo zokuqeqeshelwa ukuba ngamaphoyisa omgwaqo.
NgoMsombuluko ngabo-10 ekuseni umnyango ukhiphe isitatimende esithi usubhalise izivivinyo zokuhlunga intsha engaphezu kuka-7 000 ohlelweni oluqhubeka eRoyal Showground, eMgungundlovu.
“Besithole izicelo ezingaphezu kuka-34 000. Lokhu kuyinkomba ecacile yentshisekelo intsha enayo yokuba yingxenye ye-RTI. Kuyasikhuthaza nokubona indlela abesekwa ngayo yimindeni yabo labo abafake izicelo,” kusho isitatimende.
Siqhube ngokuthi umnyango uyaxolisa kwabayizakhamuzi, abasebenzi nabashayeli abaphazamisekile ngenxa yesiphithiphithi eMphithi esidalwe yizindimbane zabantu abahambele eRoyal Showground.