Kuzohlanganiswa abazalwane ngomculo wokholo eNewcastle
UMFU Timothy Myeni nomkakhe uSibhekile Myeni beNcandweni Christ Ambassadors bazobe bedumisa eNewcastle
Image: FACEBOOK
UNOZIPHO Phiri uzobe edumisa nomphakathi waseNewcastle
Image: FACEBOOK
KUZOHLANGANISWA abazalwane bamabandla ahlukahlukene ngamandla omculo wokholo kwi-We Lift Him Higher Gospel Music Experience eNewcastle Show Hall ngoNovemba 22 kusukela ngo-5 ntambama.
Umgqugquzeli wale ndumezulu yomcimbi, uThulani Ga Ndlela weGa Music Productions, uthe inhlosongqangi wukwakha ubumbano kubathandi bomculo wokholo ukuze kuqhakanjiswe inkolo.
"I-We Lift Him Higher Gospel Music Experience iqhubeka nokuletha ithemba nenkuthalo ezindaweni zaKwaZulu-Natal. Inhloso yethu wukuhlanganisa imiphakathi ngamandla omculo wokholo, sigubhe izinto ezingamagugu ethu nenkolo njengoba sesibheke emaholidini kaKhisimusi. Simema wonke umuntu ukuba azohlanganyela nathi kulo mcimbi ozobe uvuselela izinhliziyo nemiphefumulo."
Uthe kulo nyaka bazimisele ukusebenzisa lo mcimbi ukukhuthaza ubunye kubantu bakulesi sifundazwe.
UGa uthe ubophele abaculi abazoshiya onombeza nethemba kuvuselelekile, okubalwa kubo uNozipho Phiri, Jabu Hlongwane, Lusanda Beja, Sindi Ntombela, Ncandweni Christ Ambassadors noMpumi Mtsweni.
Esephetha uthe amathikithi aseyatholakala kwaSpar, Sasol naseTicketPro kodwa eminye imininingwane izotholakala ekhasini lakhe likaFacebook: Thulani Ga Ndlela.
UMPUMI Mtsweni uzobe ebusisa abazalwane eNewcastle
Image: FACEBOOK
USINDI Ntombela ungomunye wabaculi abazobe bedumisa nabazalwane eNewcastle
Image: FACEBOOK