ISoul Brothers igubha iminyaka ewu-50 ngokukhumbula abasunguli bayo

IZINGWAZI zomculo wombhaqanga, iSoul Brothers, zizogubha ukuqeda iminyaka ewu-50 ziyibambile insimbi ishisa kule ndima ngokukhumbula ozakwabo abangasekho emhlabeni.

Ngokusho komunye wabasunguli boGandaganda baseNingizimu Afrika, okuyigama okuteketiswa ngalo iSoul Brothers, uMoses "Black Mose" Ngwenya, abaculi abazokhunjulwa ngamagalelo abo kuleli qembu elasungulwa ngo-1975, ngoDavid "Mdavu" Masondo, Themba "American" Zulu, Tuza Mthethwa noZenzele "Zakes" Mchunu, okungabanye babasunguli.

Uthe bazobakhumbula nge-albhamu esihloko sithi 50 Years of Ogandaganda equkethe ngisho izingoma ezaqoshwa besadla anhlamvana eminyakeni eyedlule futhi nakwikhava kuzovela izithombe zalezi zinsizwa ezinhlanu zisengamabhungu.

"Okukhethekile ngaleli cwecwe ukuthi abalandeli bethu bazokuzwa okokugcina iphimbo lobengumholi waleli qembu, uDavid Masondo. Ngale albhamu sithulela yena isigqoko nabanye ozakwethu abaklame indima emlandweni wethu."

Uthe amanye amalungu abawahloniphayo ngoJapan Sidoyi, Sipho Bhengu, Mpompi Sosibo, Lawrence Mathoa, Vusi Mabuza, Mbongeleni Dladla, Javas Magubane, Lemmy "Special" Mabaso, Thomas Phale, Maxwell "Mafuthenkukhu" Mngadi, Sicelo Ndlela, Sifiso Nyoka noJuly Nhlabane.

Uthe okunye okuyingqophamlando ngale albhamu ukuthi babophele neciko laphesheya kwezilwandle elizakhele udumo ngokudlala i-organ yomlomo, u-Adam Glezzer.

"U-Adam wasivakashela sisaqopha ngolunye usuku, sabe sesithatha isinqumo sokumpika kwelinye lamaculo ethu."

UBlack Mose uthe isinqumo sokuhlonipha sokugubha ngale ndlela uthe samfikela emuva kokukhipha i-albhamu yabo ethi Hamba Naye ngo-2023.

"Umqondo wangifikela ekuqaleni kuka-2024. Ngabe sengivumbulula imisebenzi yethu emidala kusukela ekuqaleni. Ngabe sengizithela ezingomeni esaziqopha kodwa sangazikhipha ngenxa yokuthi zazingafinyeleli ezingeni lethu kodwa ngangazi ukuthi zazimnandi."

Uthe ube esezididiyela kabusha ngosizo lwe-AI ukuze zihambisane nesigqi somculo samanje. Eqhuba uthe kukhona akuthuntuthile futhi wazivuselela kabusha ukuze zihambisane nesigqi seSoul Brothers samanje. Nakuba kunjalo kodwa uthe akawuguqulanga umongo nomyalezo wazo. 

Ngaphandle kwale albhamu, uBlack Moses uthe bahlele uchungechunge lwamakhonsathi ngenhloso yokugubha nabalandeli ebebewa bevuka neSoul Brothers kule minyaka ewu-50 yasungulwa. Uthe ikhonsathi yokuqala izoba sePiet Retief Town Hall, eMpumalanga, ngo-Okthoba 30, naseMpangeni Town Hall, ngoNovemba 1.

Esephetha uBlack Mose, uthe basazozimemezela nezinye izindawo abasazozihambela nezinsuku zakhona. 

ISoul Brothers yaqalwa ngokuthi ibhendi eyayikhiwe yizinsizwa zaKwaZulu-Natal, uZakes owayengumdlali wesigingci sebhesi, uMdavu owayengumdlali wama-drums noTuza owayengumdlali wesigingci esijwayelekile. Yize zahlangana eHammarsdale kodwa uMdavu wayebuya kwaZenzele, eHowick.  Zazizibiza ngeGroovy Boys ngaphambi kokuzibiza ngeYoung Brothers. Ngaleso sikhathi zazidlala izinsimbi kuphela, kungaculi muntu. Zabe sesifudukela eGoli lapho zafike zahlangana khona nomdlali we-organ uBlack Mose ukuze kusunguleke iSoul Brothers ngo-1975.

UMdavu wabe esecula phambili.Ukuhlangano komzwilili wezwi likaMdavu nobumnandi be-organ kaBlack Mose okwenza iSoul Brothers yahluka emaqenjini amaningi. Leli qembu laqhamuka nesigqi esiyame ohlobeni lomculo wase-USA, iSoul Music. Yingakho bazibiza ngeSoul Brothers futhi begqokisa okwabaculi abenza lolu hlobo lomculo abanjengoJames Brown.

Ngokuhamba kwesikhathi leli qembu lashiya kwiSoul Music lagxila kumbhaqanga noma umgxobanyawo. Nesigqi sashintsha kanye nendlela yokugqoka. I-albhamu eyamenza bavelela eyayisihloko sithi Mshoza Wami ngo-1976. Kusukela lapho leli qembu alibange lisabheka emuva. Umsakazi owalibeka ezingeni eliphezulu kwakunguCyril Bongani "Kansas City" Mchunu weRadio Zulu (osekuwuKhozi FM). Ema-albhamini angaphezu kuka-45, ashisa kakhulu izikhotha ngathi Mantombazane (1978),Isicelo (1983),Xola (1987) nethi Impimpi (1998).

NgoKhisimusi umuzi nomuzi wawuhlale une-albhamu yaleli qembu. Nakuba kwakukhona abanye abaculi abanjengoBangani, Abakhwenyana, Babsy Mlangeni, Pat Shange, Thisha Nzuza kodwa iSoul Brothers yayizintandokazi kunabo bonke. Laliwola inqwaba yemiklomelo ngapha nangapha.

Imitshotshovu ayithandwanga kuleli kuphela kodwa beyingasaconsi phansi nasemazweni angomakhelwane anjengoZimbabwe. Yake yazungeza i-Europe, ishiya abantu besahalela impinda ngomdanso wayo onenkosi phakathi.  Yilo qembu elathatha umculo wombhaqanga lawubeka ebalazweni lomhlaba. 

Kwathi kusemnandi kunjalo, waqala umshophi wokushona kwamlungu aleli qembu. Kwaqala kwahamba uTuza namanye amalungu amathathu ngengozi yemoto ngo-1979. Kwathi ngo-1984 kwalandela uZakes.

U-American wahamba emhlabeni engaselona ilungu laleli qembu. Nakuba kunjalo uMdavu noBlack Mose bayibamba insimbi ishisa kwaze kwaba kuhamba emhlabeni uMdavu okunguye obecula zonke izindlela ngo-2015.  Umculi kamaskandi Ihhashi Elimhlophe noMbongeni Ngema bake basebenza ngaphansi kwaleli qembu.

Njengamanje sekucula phambili uNkosinathi Ngwenya noThokozani Hadebe.Sekukhona nendodana kaMdavu, uSphamandla Masondo obecula phambili koGuluva. Amanye amaqembu abengaphansi kweSoul Brothers yiMitshotshovu (osekuyiMpumelelo).