Angaphezu kuka-41000 amacala abhajwe ophikweni oluhlola izibhamu
Imidwebo ekhombisa ukuthi izikhali ezasetshenziswa ekubulaweni kukanjiniyela u-Armand Swart, u-Oupa “DJ Sumbody” Sefoka, noHector “DJ Vintos” Buthelezi zimataniswa kanjani namacala angaphezu kuka-20. Ukuqinisekiswa kwe-Ballistic kusalindile.
Image: Kamogelo Moichela/ IOL News
Ungoti wophiko lokuhlolwa kwezinhlamvu nezibhamu emaphoyiseni uBrigadier Mishak Mkhabela, udalule ukuthi alinganiselwa ku-41 846 amacala obugebengu asabhajwe esigcawini sabo, amaningi ancike ebufakazini obubucayi ngenxa yokuntuleka kwabasebenzi, kanti izinkantolo zisaqhubeka nokukhipha izincwadi ezigunyaza ukuboshwa.
Ethula ubufakazi phambi kweKhomishana kaMadlanga ngoMsombuluko, uMkhabela udwebe isithombe sokudonsa kanzima kwezinhlelo - ekhutshazwa ukushoda kwabasebenzi, ukushoda kwezinsizakusebenza kanye nokugcwala ngokweqile kwezindawo zokugcina ubufakazi.
"Siphinde sahlela kabusha umnyuziyamu, futhi nawo ugcwele," esho, ebhekisa ezinyathelweni ezinzima ezithathiwe ukugcina izibhamu ezibanjiwe kubasolwa.
"Kwiseyifu yethu, sinezibhamu ezilinde ukuhlolwa ezingaphezu kuka-29,000 zonke ezibandakanyeka emacaleni okubulala, kunjalo-nje sinabahlaziyi abangu-42 kuphela."
Ngokusho kukaMkhabela, angu-41 846 amacala asalinde ukuhlolwa okuhlanganisa angu-29 385 asuka ehhovisi likazwelonke. Angu-10 643 awango-2025 kuphela, ezaseWestern Cape zingu-5,196, iKwaZulu-Natal (KZN) ngu-3,710, kanti i-Eastern Cape angu-2,174 - okuyinkomba yokusalela emuva okukhulu okubambezela ukulethwa kobulungiswa.