Bekukuhle kudelile kuklonyeliswa abafundi

BEKUMNANDI kudelile ngesikhathi kuklonyeliswa abafundi abenze kahle ezifundweni zikamatikuletsheni kwi-Steame Grade 12 Gala Dinner ebiseNkungumathe Youth Centre, eMshisandlu, eNkandla, ngoLwesihlanu.

Umfundi obaqwaqwade bonke emkhakheni weMathematics kube uLwandle Manyoni (18) waseKwana Combined, uSinenjabulo Sithokozile Nxumalo (19) waseNkandla Technical High wabaqumba phansi kwiPhysical Science, kwathi uThabile Ntombela (18) waseMalandela High wazidlela amahlanga ezifundweni ze-Accounting.

Kuwo lomcimbi kubuye kwabongwa othisha ngeqhaza labo ekufukuleni laba bafundi, okunguMnuz Mthokozisi Myeza, Mnuz Nhlakanipho Simelane ebebefundisa iMathematics noNksz Nondumiso Majola obefundisa iPhysical Science. 

Umgqugquzeli walo mcimbi, uMnuz Mthokozi Mchunu, uthe bebebungaza abafundi baka-matric ebebefunda kulesi sikhungo ngaphansi kohlelo olubizwa ngeSteame, okumele ukuthi Sciences, Technology, Engineering, Art, Mathematics and Entrepreneurship.

Uthe laba bafundi bebefundiswa ngamaSonto kusukela ngo-8.30 kuze kushaye u-3.30 ntambama. "Bebefukulwa ngolwazi ngothisha bendawo kanye nayizitshudeni zase-Unisa."

Ubonge kakhulu uxhaso luka-R6 million abaluthole kwi-Insurance Seta. 

Uthe inhlosongqangi bekuwukufukula imfundo yezingane ebeziqhamuka esifundeni saseMzinyathi nesaseKing Cetshwayo.

"Bebebathathu abafundi ebebeqhamuka ngaphansi kwesifunda saseMzinyathi, eyedwa obevela kwesaseZululand bewu-9 ebebevela kwesaseKing Cetshwayo (ikakhulukazi eNkandla)."

Isikhulumi sosuku bekunguMnuz Bonginkosi Mthombeni oyimenenja ngaphansi kweStrategic Learning Programmes kwa-INSETA. Uthe bona basebenzisa kakhulu nemishwalense ehlukahlukene. Ube esenxusa intsha ukuba ingene kwi-website yabo ukuze ibone ukuthi yiziphi izinhlelo abanazo. Uthe babuye babe nemifundaze ehlukahlukene. ULwandle ubonge kakhulu kwiNkungumathe NPO ngalolu hlelo lweSteame ngoba uthe ufunde kakhulu kulo.

Uthishomkhulu waseMzikazi Secondary, uMnuz Smanga Biyela, uthe lolu hlelo lubasize kakhulu abafundi babo ngoba lubenze bagqugquzeleka futhi baba nokuzethemba.

"Nenze omkhulu umehluko. Ngakho siyacela ningasikhohlwa nangonyaka ozayo kulolu hlelo."

Induna yesizwe sakwaMpungose, uMnuz Mandlakazulu "Vakashela" Mahaye, ithe izinhlelo zeNkungumathe NPO uyazeseka ngoba naye zimsize kakhulu ngenxa yokuthi ubengakwazi ukufunda nokubhala kodwa manje useyakwazi ukuzifundela amaphephandaba esiZulu.

"Sengifuna ukwazi ulimi lwesiNgisi manje ukuze ngingatolikelwa."

Uhlelo lwalo mcimbi beluphethwe ngabasakazi boKhozi FM, uQiniso Mbili weZangempelasonto noSkhumbuzo Mkhize ongumfumdi wezindaba kulo msakazo.

Kunandise iqembu lesicathamiya laseThala High, umculi kamaskandi uMenzi neMfezemnyama kanye neqembu lendlamu.