Ungqongqoshe ufuna kudliwe impahla yesikhulu esashona sisolwa ngenkohlakalo

UNGQONGQOSHE wezeMpilo kuzwelonke, uDkt Aaron Motsoaledi, ufunge wagomela ukuthi, nakuba sesalala kobandayo, isikhulu esiphezulu sesibhedlela iTembisa, uDkt Ashley Mthunzi, asizukuthethelelwa ngeqhaza laso ekugetshengeni imali engaphezu kuka-R2 billion ngamathenda angekho emthethweni esibhedlela. UMthunzi ukhonjwe ngenjumbane embikweni wesikhashana, owakhishwa uphiko oluphenya amacala ayisipesheli (SIU) ngenyanga edlule, esikhathini esingaphezu konyaka ashona ngo-April 24, 2024.

I-SIU isaqhubeka nokuphenya ngezinsolo zenkohlakalo nokungaphathi ngendlela ethinta amaqembu ezigebengu aholwa ngosomabhizinisi uVusi “Cat” Matlala, Hangwani Maumela, noRudolf Mazibuko, ngosizo lwabasebenzi basesibhedlela.

Umbiko udalule ukuthi uMthunzi wagunyaza amathenda engahambisani nomthetho, nokuthi izincwadi zesinkampani ezithunyelwe eMnyangweni wezeMpilo eGauteng zinezitifiketi ezingekho emthethweni ezingakaze ziphonselwe inselelo ngabasebenzi besifundazwe nakuba amanani entengo ayenyuswe ngokweqile.

Ekhuluma kuSAFM ngoMgqibelo ekuseni, uMotsoaledi uthe uMthunzi ushiye ngemuva impahla ezothathwa.

“Ngiyazi ukuthi i-CEO yaseTembisa ekhonjwa ngenjumbane ayisekho emhlabeni, ukuthi akasekho akusho ukuthi seliphelile icala,” kusho uMotsoaledi.

Unkosikazi kaMthunzi, uLerato Mthunzi, onguNobhala Jikelele wenyunyana i-Health and Allied Workers Indaba Trade Union (HAITU), uthi umyeni wakhe uyimbuzi yomhlatshelo ngoba owaziwa ukuthi akasekho.

Kuze kwashaya isikhathi sokushicilela engasiphenduli isicelo asithunyelelwe ngoMgqibelo emini ukuba aphendule isitatimende sikangqongqoshe.