Kuzodla uR110 million ukulungisa isiShayamthetho sasoNdini
UMPHATHISWA woMnyango wokuBusa ngokuBambisana neziNdaba zoMdabu uMfu Thulasizwe Simelane, uNdunankulu waKwaZulu-Natal uMnuz Thami Ntuli noMphathiswa woMnyango wemiSebenzi kaHulumeni nezoKwakha uMnuz Martin Meyer nezinhlaka zikahulumeni wesifundazwe bezokwethula uhlelo lokulungisa isiShayamthetho esisoNdini, enyakatho yeKwaZulu-Natal ngoLwesihlanu
Image: SIMANGALISO NTSHANGASE
KULINDELEKE ukuthi kusebenze imali engaphezu kukaR110 million ngokulungisa isakhiwo sesiShayamthetho esisoLundi, enyakatho yeKwaZulu-Natal, okwathikamezeka ukusebenza kwaso ngenkathi sicekelwa phansi yisiphepho esahlasela esifundazweni.
Lokho kudalulwe nguNdunankulu waKwaZulu-Natal uMnuz Thami Ntuli esithangamini nabezindaba ebesikuso lesi siShayamthetho ngoLwesihlanu, lapho yena nethimba abambisene nalo eliholwa nguMphathiswa woMnyango wemiSebenzi kaHulumeni noKwakha uMnuz Martin Meyer noMphathiswa woMnyango wokuBusa ngokuBambisana neziNdaba zoMdabu uMfu Thulasizwe Buthelezi, bethule ngokusemthethweni usonkontileka ozokwengamela ukulungisa lesi sakhiwo.
UNdunankulu uthe kumanje sebevele banayo imali engaphezudlwana kukaR20 million, ezosetshenziswa ukulungisa uphahla lwesakhiwo ukusiza ukuthi sivikeleke emvuleni, kulungiswe nezinye izinto, nomsebenzi uqhubeke kahle.
UMPHATHISWA woMnyango wokuBusa ngokuBambisana neziNdaba zoMdabu uMfu Thulasizwe Simelane, uNdunankulu waKwaZulu-Natal uMnuz Thami Ntuli noMphathiswa woMnyango wemiSebenzi kaHulumeni noKwakha. uMnuz Martin Meyer, nezinhlaka zikahulumeni wesifundazwe bezokwethula uhlelo lokulungisa isiShayamthetho esisoNdini, enyakatho yeKwaZulu-Natal ngoLwesihlanu
Image: SIMANGALISO NTSHANGASE
“Sibheke ukuthi lokho kube sekuqediwe ngoMeyi ngonyaka ozayo, bese kuqhubeka ezinye izinhlelo zokulungisa omunye umonakalo owadaleka ngenkathi sicekeleka phansi, esibheke ukuthi uma konke kuhambe kahle kube sekuqediwe ukusilungisa ekupheleni konyaka ozayo, bese kuqhubeka umsebenzi wokusebenza kwaso njengoba siwusizo kakhulu uma kuhlangana izinhlaka zikahulumeni iminyango yazo ewu-13 ukuqhuba umsebenzi wokubeka eqhulwini inhlakalakahle nentuthuko yomphakathi esibhekele ukuwuhola,” kusho uNdunankulu.
Eqhuba, ukhale ngomphakathi wakule ndawo ngesenzo sokuthi ungasinaki isiShayamthetho, futhi ube nesandla ekusicekeleni phansi kakhulu kunalokho esiyikhona manje.
“Ngakho siyakhuza ukuthi umphakathi uyeke okungalungile okwenzayo njengokuthi uvumele imfuyo ingene emagcekeni esakhiwo, ingcolise igceke laso nokunye okukhona kuso, ngoba lokho kusibuyisela emuva futhi kwenza sithikamezeke ohlelweni lwethu. Ngakho siyanxusa ukuthi umphakathi ukhuzane ezimeni ezinjalo ukuze nathi sikhuthale ukuqhubeka siwubeke eqhulwini ngokuwuthuthukisa,” usho kanje.
UMphathiswa woMnyango wemiSebenzi kaHulumeni noKwakha, uMnuz Martin Meyer, uthe enye yezinto ezenze babona kumqoka ukuthi balungise isakhiwo wukuthi bayaqonda ukuthi sineqhaza elingakanani emphakathini, nomlando waso.
“Lesi sakhiwo sineminyaka engu-42 sikhona ngakho bekusiphatha kabi ukusibona singasebenzi emva kokucekeleka phansi, yingakho sibone kumqoka ukuthi senze uhlelo olunjena lokusilungisa noluzosiza ukuthi siqhubeke sisebenze ngendlela efanele, futhi kulondolozeke nomlando waso omqoka ezweni lethu,” kusho uMeyer.