Uvuma eyokulala nomufi obhekene nelokudlwengula nokubulala

OWESILISA obhekene necala lokudlwengula nokubulala owesifazane owayekhulelwe amawele uyakuvuma ukuthi walala naye lo wesifazane.

Ummangalelwa, uMnuz Ndabenhle Lindokuhle Majola, usolwa ngokudlwengula abulale umufi, uNksz Inam Tshakeni (20).

Kuvela ukuthi umufi wayekade ehambele indawo yobumnandi eseReservoir Hills, ngoJulayi 13, wonyaka owedlule.

Kuvela ukuthi kwathi umufi uma efika kule ndawo wase ehlangana nommangalelwa. Kuthiwa ummangalelwa wagcina ebonakala ephuma ehamba naye umufi emfaka emotweni yakhe iFord Ranger.

Ngemuva kwezinsuku eziyisikhombisa, kuthiwa kwatholakala isidumbu sikaNksz Tshakeni silahliwe eCanelands, eVerulam, siphuke sakufahlaka izingalo nezinyawo. UMajola wakhalelwa ngamasongo kaSigonyela ngemuva kokuba ezifikele mathupha kule ndawo yobumnandi ngemuva kokuba sekutholwe isidumbu.

Kuthiwa kwathi uma efika, umnikazi wendawo waqaphela ukuthi uyilo mlisa ambone kwikhamera yendawo yebhizinisi ehamba noNksz Tshakeni. Kuthiwa wavala amasango wangena ngaphakathi wase ebiza amaphoyisa. UMajola ungaphakathi njengoba inkantolo yamnqabela ibheyili.

Izolo, eNkantolo eNkulu yaseThekwini, kufundwe isitatimende sikammangalelwa. Kusona uyavuma ukuthi walala nomufi kodwa uyakuphika okocansi lwendluzula. Uthe baya ocansini  ngokuvumelana, bezitika ngalo emotweni.

"Ngiyavuma ukuthi salala nomufi kodwa ngiyakuphika ukuthi ngamdlwengula,'' usho kanjena esitatimendeni.

Kulindeleke ukuthi uMajola athule ubufakazi bakhe kusasa, lapho okubhekwe ukuba achaze kabanzi ngokwenzeka ngelanga lesigameko.

Ummangalelwa ucele iJaji uBrenda Sibiya ukuba limnikeze ithuba lokuthi kube khona akubuyekezayo nommeli wakhe ngaphambi kokuba angene ebhokisini lofakazi.

UMajola wenze lesi sicelo ngemuva kokuba bekukade kulindeleke ukuthi angene ebhokisini khona izolo, nokho washaya ungqimphothwe ekhala ngokuthi akakulungele, ufisa ukuqala akhulume nommeli wakhe.

Ijaji lithe kumele lifinyelele emaphethelweni manje leli cala, kuphume nesinqumo. Libe selimdonsa ngendlebe uMajola limtshela ukuthi ngeke lisaphinde limnikeze elinye ithuba.

''Leli yithuba lokugcina ngci engikunikeza lona manje. Kufanele ungene ebhokisini ukhulume okwaziyo. Ngizokunikeza igunya okwamanje ukuthi ungangeni namhlanje kodwa lokhu makugcine namhlanje," kusho iJaji.

Ngaleso sikhathi ummangalelwa ubebonakala njengomuntu odidekile. Ubedane ebonakala ekhuluma nommeli wakhe, uMnuz Patrick Mkhumbuzi. Umshushisi uMacdonalds uveze ukuthi ohlangothini loMbuso sebeqedile, sebezolinda isinqumo senkantolo.