Ugwetshiwe owabulala ingane yesoka elaya umama wayo
UClara Masinga olahlwe yicala lokubulala ingane yesoka
Image: Sithunyelwe
INkantolo Ephakeme yaseNingizimu Afrika ehlezi eMbombela namuhla igwebe u-Clara Masinga (37), odabuka eMozambique, iminyaka engu-23 ebhadla ejele ngokubulala ngesihluku indodakazi yakhe angayizali, Jennifer Gumbi (11).
UMasinga ulivumile icala lokubulala ehlosile wagwetshwa ngokufanele. UMasinga ubethandana noyise kamufi, uRodgers Gumbi, behlala naye KwaMhlushwa, esigcemeni sasePhosaville, eMalelane.
Ngomhla ka-21 kuNdasa 2015, uMasinga wathumela umngane kamufi ukuba ayomlanda ekhaya ngesikhathi elinde kude.
Lapho amantombazane ebuya, uMasinga wacela uJennifer ukuba amphelezele aye kwakhe, ethi kukhona umuntu amaziyo owayefisa ukumthengela izingubo. Ngesikhathi efika uMasinga washayela ucingo owayesebenzisana naye owasala nengane ngesikhathi eya esotolo esiseduze eyothenga ice cream noshevu wamagundane (Rattex).
UMasinga nabehamba naye babe sebegaya ushevu bawuhlanganisa no-ayisikhilimu ngaphambi kokuwunikeza ingane. U-Jennifer washona kamuva ngemva kokudla u-ayisikhilimu onoshevu, futhi isidumbu sakhe esifile satholwa silahlwe emgodini ongashoni eduze nomfula uMlumati. Uphenyo olunzulu lwamaphoyisa luholele ekuboshweni kukaMasinga.
Enkantolo, uMasinga uvumile ukuthi ukuziphatha kwakhe kuphambene nomthetho futhi umthetho unesijeziso. Ungene esivumelwaneni seSigaba 105A sesigwebo noMbuso, esamukelwe. Esitatimendeni sakhe sokuncenga, udalule ukuthi inhloso yakhe ngokubulala ingane kwakuwukuthi isoka linganaki umama ozala isisulu. Ngesikhathi kuqhubeka ukuqulwa kwesigwebo, u-Advocate woMbuso uSenzo Zindela uveze ukuthi ummangalelwa wabulala ingane engenacala ethonywe omunye umuntu futhi waphinde wangcolisa isidumbu ngokusithela ngamanzi abilisiwe ukuze aqinisekise ukuthi inhloso yakhe iyaphumelela. Unxuse inkantolo ukuthi ikhiphe isigwebo esikhombisa ubunzima becala.
Lapho ekhipha isigwebo, Ijaji uVukeya ugxeke ukwanda kwezigameko zodlame lwasekhaya nokubulawa kwabesifazane nezingane eNingizimu Afrika. IJaji liphawule ukuthi ummangalelwa wabulala ingane engenacala ngenxa yokuzonda unina futhi asikho isigwebo esingabuyisa umphefumulo olahlekile. Kodwa-ke, inkantolo ithole ukuthi kunezimo eziphoqelelayo ukuthi kugwenywe isigwebo esincane esinqunyiwe ngenxa yalokho yamgixabeza iminyaka engu-23 ejele ngokuqondile. Umsolwa kuthiwe akafaneleki ukuba nesibhamu.